धनगढी (हाम्रो खेलकुद) – मनाङ मर्स्याङ्दी क्लब छैटौं संस्करणको मुख्यमन्त्री सुदूरपश्चिम खप्तड गोल्डकपको सेमिफाइनलमा प्रवेश गरेको छ ।

धनगढी रंगशालामा सोमबार भएको खेलमा बागमती युथ क्लब सर्लाहीलाई २–१ ले हराउँदै मनाङले अन्तिम चारमा स्थान बनाएको हो ।

मनाङको जितमा कोफी टिमोथी कुडो र साइदजामोल दाभ्लालजोनोभले गोल गरे । बागमतीका लागि सृजन गौतमले एक गोल फर्काए ।

खेलको ३७औं मिनेटमा टिमोथीले गोल गर्दै मनाङलाई सुरुवाती अग्रता दिलाए । तर, मनाङको त्यो अग्रता लामो समय टिकेन । ४१औं मिनेटमा सृजनले बराबरी गोल फर्काए । ६६औं मिनेटमा साइदजामोलले गोल गर्दै मनाङलाई २–१ को जित दिलाए ।

अब मनाङले एभिनिर फुटबल क्लब क्यामरुनसँग सेमिफाइनलमा प्रतिस्पर्धा गर्नेछ । उक्त खेल चैत १५ गते हुनेछ । प्रतियोगिता अन्तरगत मंगलबार आयोजक सुदूरपश्चिम–११ र विभागीय टोली नेपाल पुलिस क्लबले प्रतिस्पर्धा गर्नेछन् ।

मोफसलको सर्वाधिक पुरस्कार राशीको प्रतियोगिताको विजेताले २१ लाख रुपैयाँ र उपविजेताले १० लाख रुपैयाँ प्राप्त गर्नेछन् । सुदूरपश्चिम प्रदेश सरकार मुख्य प्रबद्र्धक रहेको प्रतियोगितालाई सुदूरपश्चिम ११ स्पोर्टस क्लबले आयोजना गरेको हो ।

प्रतियोगितामा आयोजकसहित ‘ए’ डिभिजन ६, विदेशी टोली २ र मोफसलको एक गरी १० टोलीको सहभागिता रहेको छ । चैत ९ गतेदेखि सुरु भएको प्रतियोगिताको फाइनल खेल १८ गते हुनेछ ।