काठमाडौं (हाम्रो खेलकुद) – फिफा विश्वकप २०२६ को पहिलो चरणका लागि नेपाली राष्ट्रिय फुटबल टोलीको प्रारम्भिक नामावली घोषणा भएको छ । प्रशिक्षक भिन्सेन्जो अल्बर्टो अनेसेले डेब्यु गर्न बाँकी रहेका १२ खेलाडी समेट्दै ३० सदस्यीय टोली घोषणा गरेका हुन् ।

ए डिभिजन लिगमा गरेको प्रदर्शनको आधारमा प्रशिक्षक अनेसेले टोलीमा खेलाडी छनोट गरेका हुन् । ४ खेलाडी पहिलो पटक प्रारम्भिक टोलीमा पर्दा यसअघि अनेसेको रणनीतिक प्रशिक्षणमा सहभागी भएका ६ खेलाडी टोलीमा पुन: आएका छन् । विगतमा टोलीमा परेर डेब्यु गर्न नपाएका दुई खेलाडीले पुनरागमन गर्दा राष्ट्रिय टोलीको जर्सी लगाइसकेका मिडफिल्डर सुदीप गुरुङ टोलीमा फर्केका छन् ।

डिफेन्डरद्वय अन्जन राई र छिरिङ लामा तथा मिडफिल्डरद्वय उत्सव राइ र विवेक पौडेल पहिलो पटक राष्ट्रिय टोलीको प्रारम्भिक छनोटमा परेका हुन् । गोलरक्षक अनिष देउला, मिडफिल्डर विशाल तामाङ, डिफेन्डरद्वय अन्जल महर्जन र आशिष गुरुङ तथा फरवार्डद्वय दिनेश हेन्जन र जिलेस्पी जंग कार्की यसअघि प्रशिक्षक अनेसेको रणनीतिक प्रशिक्षणमा भने सहभागी थिए । गोलरक्षक अभिषेक बराल र कृतिश रत्न छुन्जु भने राष्ट्रिय टोलीमा रहेपनि डेब्यु गर्न बाँकी रहेको छ ।

साफ खेलेको टोलीबाट गोलरक्षक विशाल श्रेष्ठ, डिफेन्डर निशान खड्का, मिडफिल्डरत्रय पुजन उपरकोटी, नविन लामा र मणि लामा तथा फरवार्ड दिपक राज सिंह ठकुरी यसपटक टोलीमा समावेश भएका छैनन् । विशालले राष्ट्रिय टोली करिअरबाट बिदा लिने चर्चा चल्दा अन्य खेलाडी भने अष्ट्रेलिया प्रस्थान गर्ने सम्भावना छ । मिडफिल्डर सुदीप गुरुङले राष्ट्रिय टोलीमा पुनरागमन गरेका छन् ।

नेपालले अक्टोबरमा फिफा विश्वकप २०२६ छनोटको पहिलो चरणको खेलमा प्रतिस्पर्धा गर्दैछ । दुई लेगमा हुने उक्त प्लेअफ चरण पार गरेपछि मात्र दोस्रो चरणमा नेपाल छनोट हुनेछ ।

३० सदस्यीय प्रारम्भिक टोली :

गोलरक्षक : किरण चेम्जोङ, अनिष देउला, अभिषेक बराल, दिप कार्की

डिफेन्डर : विमल पाण्डे, सनिश श्रेष्ठ, अनन्त तामाङ, देवेन्द्र तामाङ, आशिष गुरुङ, रोहित चन्द, सिमान्त थापा, अन्जल महर्जन, छिरिङ लामा, अन्जन राई

मिडफिल्डर : एरिक विष्ट, सुदीप गुरुङ, लाकेन लिम्बु, आवास लामिछाने, उत्सव राई, विशाल तामाङ, विवेक पौडेल, क्रितिश रत्न छुन्जु

फरवार्ड : आयुष घलान, नवयुग श्रेष्ठ, अन्जन विष्ट, मनिष डाँगी, आशिष चौधरी, विमल घर्ती मगर, जिलेस्पी जंग कार्की, दिनेश हेन्जन