एजेन्सी – पोर्चुगिज फुटबल टोलीका कप्तान क्रिस्टियानो रोनाल्डो खेलका कारण मात्र होइन अभिव्यक्तिका कारण पनि चर्चामा रहने गर्दछन् । उनले मेजर लिग सकर (एमएलएस) टोली इन्टर मायामीको कार्यक्रमलाई खल्लो बनाइदिने गरि बयान दिएका छन् ।

इन्टर मायामीले अर्जेन्टिनी सुपर स्टार लियोनल मेस्सीलाई महत्वका साथ सार्वजनिक गरेको भोली पल्ट रोनाल्डोले एमएलएसको स्तरमाथि प्रश्न गरेका छन् । साथै उनले आफू साउदी प्रो लिगलाई विश्वको उत्कृष्ट प्रतिस्पर्धा बनाउनमा प्रतिबद्ध रहेको बताएका छन् ।

साउदी क्लबहरुले अहिले विश्व स्तरीय खेलाडीहरुलाई क्लबमा अनुबन्ध गर्न आकर्षित गरिरहेका छन् । रोनाल्डो जनवरीमा मध्य पूर्व एसियाको क्लब अल नासर आबद्ध भएका थिए । बालोन डि ओर विजेता करिम बेन्जेमा जुनमा अल इत्तिहादमा आबद्ध भए ।

रोनाल्डोका पोर्चुगिज सहकर्मी रुवेन नेभिस बार्सिलोना छाडेर अल हिलालमा आबद्ध भएका छन् । एनगोलो कान्टे पनि बेन्जेमासँग अल इत्तिहालमा जोडिएका छन् । लिभरपुलका मिडफिल्डरद्वय फाबियानो र जोर्डन हेन्डरसन पनि साउदी जाने सम्भावना रहेको छ ।

युरोपमा उच्च प्रदर्शन गर्दै आएका तर उमेर ढल्दै गरेका खेलाडीलाई साउदी क्लबहरुले प्राथमिकतामा राखेका छन् । रोनाल्डोको आगमनसँगै साउदीको लिगमा अन्य खेलाडीको पनि चासो भने बढेको छ । यसबीचमा प्रि सिजनमा रहेका अल नासर सेल्टा भिगोको बी टोलीसँग ५–० ले पराजित भएको छ । त्यसले साउदीको स्तरमा पनि प्रश्न भने खडा गरेको छ ।

मेस्सीलाई पनि अनुबन्ध गर्न सकेको भए फुटबललाई अर्को स्तरमा लान सकिने विश्वास साउदी अधिकारीहरुको रहेको थियो । तर साउदी अरेबियाको टुरिजम एम्बेसडर बन्न तयार भएपनि मेसीले व्यवसायिक फुटबलका लागि भने अमेरिका रोजे । अल हिलालको प्रस्तावलाई छाडेर ३६ वर्षे अर्जेन्टिनी कप्तान इन्टर मायामीमा गए । मेस्सीले शुक्रबार लिग्स कपमा क्रुज अजुलविरुद्ध खेल्दै इन्टर मायमीबाट डेब्यू गर्ने सम्भावना छ ।

विवादित बयान दिने क्रममा रोनाल्डोले भनेका छन्, साउदी लिग एमएलएस भन्दा साउदी लिग उत्कृष्ट छ । म शतप्रतिशत पक्का छु युरोपियन क्लब फर्कने छ्रन । मैले साउदीका लागि बाटो खोले अहिले धेरै खेलाडी आइरहेका छन् ।