पोखरा (हाम्रो खेलकुद)– रमपम झापा ११ आहा रारा गोल्ड कप फुटबल प्रतियोगिताको क्वार्टरफाइनलमा पुगेको छ । कर्ण लिम्बु सुब्बाको उच्च प्रदर्शनबाट प्रेरित झापा एएनए युएसएलाई ४–१ ले हराउँदै अन्तिम आठमा पुगेको हो । अब झापाले गत बर्षको उपविजेता त्रिभुवन आर्मीसँग माघ १० मा क्वार्टरफाइनल खेल्नेछ । झापाका लागि ह्याट्रिक पुरा गरेका कर्णले अर्को गोलका लागि पास मिलाइदिएका थिए ।
कर्ण पहिलो हाफमा ६ मिनेटको फरकमा दुई गोल गर्दै झापालाई अघि बढाएका थिए । पहिलो पटक पोखरा आएको एएनए युएसएले सोचे अनुरुपको प्रदर्शन गर्न सकेन भने झापा विस्तारै लयमा देखियो । अघिल्लो महिना काँकरभिट्टा गोल्डकप नकआउट प्रतियोगिता उपाधि जितेर पोखरा आइपुगेको झापाका लागि कर्णले २५ औं मिनेटमा पहिलो गोल गरे ।
३० औं मिनेटमा रजिन धिमालको पासमा दोस्रो गोल गरेका उनले दिलान लोक्तानको पासमा अन्तिम मिनेटमा ह्याट्रिक पुरा गरेका थिए । कर्णले ह्याट्रिक अघि ७४ औं मिनेटमा बुद्ध चेम्जोङको गोलमा पास मिलाइदिएका थिए । एएनए युएसएका लागि ८५ औं मिनेटमा परिवर्तित शिशिर विश्वकर्माले सात्वना गोल फर्काएका थिए । कर्ण खेलको म्यान अफ दी म्याच घोषित भए । उनले खेलका दौरान थप दुई गोल गर्ने अवसर उपयोग गर्न सकेनन् ।
आहा रारा गोल्डकपमा शुक्रबारको खेल
नेपाल पुलिसविरुद्ध सिएमजी संकटा
