पोखरा (हाम्रो खेलकुद)– आहा रारा गोल्ड कप फुटबल प्रतियोगिताको सफल टोली मध्येको एक नेपाल पुलिस क्लब पछिल्लो समय खराब फर्मबाट ग्रजिरहेको छ । टोलीका सफल प्रशिक्षक विराटकृष्ण श्रेष्ठले पनि अहिले टोलीमा छैनन् । एक समय थियो, टोली घरेलु फुटबलका लिग र नकआउट प्रतियोगिताको मुख्य दाबेदार हुने गथ्र्यो । पछिल्लो केही बर्षयता भने टोलीको परिचय बदलिएको छ । टोलीले सोचे अनुरुपको सफलता पाउन सकेको छैन ।
आहा रारा गोल्डकपमा पनि छ बर्षयता टोली खाली हात फर्कदै आएको छ । २०५८ को क्याराभन गोल्डकपलाई जोड्ने हो भने पोखरामा पुलिसले ५ पटक जितेको छ । त्यसअर्थमा आहा गोल्ड कपमा पुलिस सर्वाधिक सफल टोली हो । लक्ष्मी हुन्डाई मनाङ मस्र्याङ्दी क्लब र रुस्लान थ्री स्टारले पनि समान ४ तथा आयोजक सहारा क्लब र अफ्रिकन युनाइटेड क्लबले समान एक पटक आहा रारा गोल्डकपको उपाधि जितेको थियो ।
तर अहिले पुलिस लयमा फर्कन संघर्ष गरिरहेको छ । २०६६ यता पुलिस आहा गोल्डकपको फाइनल पनि पुग्न सकेको छैन । गत महिना पूर्वाञ्चलमा सातौं राष्ट्रिय खेलकुदमा फाइनल पुग्न असफल पुलिस त्यसपछि टुबोर्ग हेटौंडा गोल्ड कपमा पनि पहिलो चरणबाटै बाहिरीएको थियो । यस्तो पृष्ठभूमिमा टोलीले आहा रारा गोल्डकपमा शुक्रबार अर्को ए डिभिजन क्लब सिएमजी क्लब संकटाको सामना गर्दैछ ।
यो बर्ष चितवन विकास रनिङ शिल्ड जितेको संकटा गत सातामात्र सुदूरपश्चिमाञ्चल खप्तड गोल्डकपको फाइनल खेलेर पोखरा आइपुगेको छ । यद्दपी टोलीले काँकरभिट्टा गोल्डकप र हेटौंडामा उच्च प्रदर्शन गर्न सकेन । संकटा तीन बर्षपछि आहा खेल्न आएको हो । यसअघिका दुई सहभागितामा टोली क्वार्टरफाइनल भन्दा अघि बढ्न सकेको छैन ।
२०६१ मा पहिलो र २०७० मा दोस्रो पटक सहभागि भएको संकटा दुवै पटक क्वार्टरफाइनलमा मनाङसँग पराजित भएर राजधानी फर्केको थियो । पहिलो सहभागितामा धरानलाई र दोस्रो सहभागितामा जावालखेललाई हराउँदै संकटा अन्तिम आठमा पुगेको थियो ।
