पोखरा (हाम्रो खेलकुद)– आहा रारा गोल्डकप फुटबल प्रतियोगितामा आजबाट क्वार्टरफाइनल सुरु हुँदैछ । पोखरा रंगशालामा शनिबार पूर्व विजेता समेत रहेको आयोजक सहारा क्लबले भारतीय टोली सिक्किम युनाइटेडको सामना गर्दैछ ।
पहिलो खेलमा सुदूर पश्चिमलाई ४–० ले हराउँदै अघि बढेको सहाराले आज क्वार्टरफाइनलमा भारतको सिक्किम युनाइटेडको सामना गर्दैछ । गत बर्ष पनि यी दुई टोलीबीच क्वार्टरफाइनलमै भेट भएको थियो । त्यसमा सहारा २–० ले विजयी भएको थियो । भारतीय राष्ट्रिय फुटबल टोलीका पूर्व कप्तान भाईचुङ भुटियाको सिक्किम युनाइटेड आहा गोल्डकपमा सहभागी भएको यो दोस्रो पटक हो । दुवै पटक टोलीले सोझै क्वार्टरफाइनल खेलेको थियो ।
सहारा क्लबले आयोजना गर्ने आहा रारा गोल्डकप पोखरालाई चिनाउने एउटा बलियो माध्यम भैसकेको छ । २०५८ मा क्याराभान गोल्डकप र त्यसपछि लगातार १५ औं संस्करण आहा रारा गोल्डकपको आयोजनाको इतिहास १६ बर्ष छोइसकेको छ । सामाजिक काम गर्ने उद्देश्यबाट सुरु भएको सहारा क्लब अहिले देशकै उदारणीय र चुस्त व्यवस्थापनका कारण सफल क्लबमा पर्दछ ।
यसले देश भित्रमात्र होइन, देश बाहिर पनि आफ्नो खासलाई फैलाएको छ । अहिले सहाराकै नामबाट देश बाहिर पनि सहारा युके, सहारा हङकङ र सहारा अस्ट्रेलियाको नाममा क्रियासिल छ । अनाथका लागि आवासिय फुटबल एकेडेमी सञ्चालन र आहा गोल्डकप आयोजना सहाराको मुख्य काम हुन् ।
देशमा हुने सबै खाले नकआउट प्रतियोगितामा व्यवस्थापन, दर्शकका हिसाबले सम्भवत सबैभन्दा अब्बल मानिने आहा गोल्डकपमा सहाराको आफ्नो प्रदर्शन भने एकदमै सफल छैन । यद्दपी टोलीले १२ औं संस्करणको आहा रारा गोल्डकपको उपाधि घर मै राख्न सफल भएको थियो । १४ औं संस्करणको समाप्तीसम्म सहाराले जितेको त्यो एउटै उपाधि हो । १२ औं को फाइनल पुगेपछि १३ औं संस्करणमा टोली पहिलो चरणबाटै बाहिरिएको थियो । गत बर्ष भने टोलीले सेमिफाइनल सम्मको यात्रा तय गरेको थियो ।
