लिभरपुल – (एजेन्सी) – घरेलु मैदानमा पछी पर्दै लिभरपुलले स्वान्सी सिटीसँग ३-२ ले हार्दै प्रीमियर लिगमा चेल्सीसँग दुरी छोट्याउने मौका गुमाएको छ ।
घरेलु मैदानमा अघिल्लो १ बर्ष यता प्रीमियर लिगको १७ खेलमा अपराजित रहेको लिभरपुलले रक्षात्मक त्रुटिका कारण पराजयको सामना गर्नु पर्यो। पहिलो हाफ गोलरहित रहे पनि दोश्रो हाफ भने रोमाञ्चक रह्यो । एथ्लेटिक बिल्बाओका पुर्व स्ट्राइकर फर्नान्डो लोरेन्टेको दुइ गोलमा स्वान्सीले दुइ गोलको अग्रता लिएपनि लिभरपुललाई फर्मिनोले दुइ गोल गर्दै खेलमा फर्काए ।
लोरेन्टेले ४८औं मिनेटमा स्वान्सीको कर्नरलाई सदुपयोग गर्दै गोल गरेर पाहुना टोलीलाई अग्रता दिलाए भने ५३ मिनेटमा टोटेन्ह्यामका पुर्व मिड्फिल्डर क्यारोलको शानदार क्रसलाई हेडर मार्फत गोलमा परिणत गर्दै स्वान्सीको अग्रता दोब्बर पारे।
फर्मिनोले ५५औं र ६९औं मिनेटमा गोल गर्दै घरेलु समर्थकमा आशा जगाएपनी जितको खोजिमा रहेको लिभरपुलले ‘काउन्टर एट्याकमा’ गोल खायो। सिगुड्सनको गोलले स्वान्सीले खेलमा पुन: अग्रता लियो ।
लिभरपुलले खेलको निर्धारित समय र अतिरिक्त ५ मिनेटमा गोल गर्ने थुप्रै प्रयास गरेपनी गोल फर्काउन नसक्दा स्वान्सी सिटीले एन्फिल्डमा प्रीमियर लिगको पहिलो जित रच्यो ।
