एजेन्सी – वैकल्पिक खेलाडीका रुपमा मैदान प्रवेश गरेका वायन रुनीले खेलको अन्तिम समयमा गोल गरेपछि म्यानचेस्टर युनाईटेडले स्टोक सिटिसंग १-१को बराबरी खेलेको छ।
खेलको १९औं मिनेटमा वान माटाको आत्मघाती गोलको मद्दतले खेलमा अगाडी बढेको घरेलु टोली जितको नजिक पुगेर अन्तिम समयमा रुनीले गोल गरेपछि तिन अंक जोड्नबाट बन्चित भएको थियो। रुनीले खेलको अन्तिम मिनेटमा फ्रिकिक मार्फत दर्शनीय गोल गरेका थिए।
यस गोलसंगै रुनीले म्यानचेस्टर युनाईटेडका लागि २५०औं गोलको कोशेढुंगा पनि पार गरेका छन्। उनले युनाईटेडको सर्वाधिक गोलकर्तामा पनि अब एकाधिकार जमाएक छन्। यसअघी उनले २४९ गोल गरेका बबी चार्ल्टनसंग सो किर्तिमान बाँडेका थिए।
बराबरीसंगै युनाईटेड अंक तालिकाको छैठौं स्थानमा यथावत रहेको छ। उसले २२ खेलमा ४१ अंक जोडेको छ।
