पोखरा (हाम्रो खेलकुद)– परिवारका साथ पोखरा घुम्न आएकी सम्बृद्धि हुमागाईले शनिबार सहारा क्लबले अनाथहरुका लागि सञ्चालन गर्दै आएको एकेडेमीलाई आर्थिक सहयोग गरेकी छिन् ।

आहा रारा गोल्ड कप फुटबल प्रतियोगितामा शनिबार सहारा र भारतको सिक्किम युनाइटेडबीच सम्पन्न पहिलो क्वार्टरफाइनलको मध्यान्तरका क्रममा सम्बृद्धिले १० हजार रुपैयाँ एकेडेमीका संयोजक विक्रम थकालीलाई हस्तान्तरण गरिन् ।

परिवारका साथ अस्ट्रेलिया बस्दै आएकी सम्बृद्धि क्याम्पसिया पब्लिक स्कुलमा कक्षा ४ मा अध्ययनरत छिन् । उनी रुस्लान थ्री स्टार क्लबका पूर्व प्रशिक्षक प्रदीप हुमागाईकी भतिजी हुन् ।

पोखरा १७ दोबिल्लामा रहेको सहाराको एकेडेमीमा विभिन्न जिल्लाका २८ जिल्लाका बालकहरु बस्दै आएका छन् । अमेरिका बस्दै आएका प्रशिक्षक हुमागाई गत बर्ष स्वदेश आएका बेला १५ दिन दोबिल्लामा रहेर त्यहाँ रहेका बालकलाई फुटबल प्रशिक्षण दिएर फर्केका थिए । शनिबार रकम हस्तान्तरमा उनी पनि थिए । 

२०५८ सालबाट क्याराभान गोल्डकपबाट फुटबल प्रतियोगिता आयोजना गरेको सहाराले यति बेला आहा रारा गोल्डकपको १५ औं संस्करण सञ्चालन गरिरहेको छ ।

एकेडेमीलाई थप व्यवस्थित रुपमा सञ्चालन गर्ने उद्देश्यका साथ वीरभद्र आचार्यको नेतृत्वमा रहेको क्लबले केही महिनाअघि निर्वतमान अध्यक्ष थकालीको संयोजकत्वमा समिति गठन गरेको थियो ।