एजेन्सी – पछिल्लो समयमा खराब लयले गुज्रिरहेको बार्सिलोनाले स्पेनिश ला लिगामा पुछारमा रहेको अल्मेरिया विरुद्ध संघर्षपूर्ण जित हात पारेको छ ।

यस सिजन कुनै खेल नजितेको अल्मेरिया विरुद्धको ३-२ जितमा बार्सिलोनाका कप्तान सर्जी रोबर्टोले २ गोल गर्दा अर्को गोल भने राफिन्हाले गरे ।

इल्काए गुन्डोगानको कर्नर किकमा रोनाल्ड आराउजोको हेडर अल्मेरियाका गोलरक्षक म्याक्सीमिआनोले बचाएपछि रिबाउन्डमा राफिन्हा सहजै गोल गर्दै खेलमा अग्रता दिलाएका थिए ।

तर ४१औं मिनेटमा अल्मेरियाले खेलमा बराबरी गोल गर्यो । डिफेन्स लाइनमा आराउजोले बल गुमाएपछि लियो बाप्टिस्टाओले गोल गर्दै खेल बराबरीमा ल्याएका थिए ।

६०औं मिनेटमा बार्सिलोनाले खेलमा पुनः अग्रता लियो । राफिन्हाको कर्नरमा सुन्दर हेडर प्रहार गर्दै रोबर्टोले खेलमा आफ्नो टोलीलाई अग्रता दिलाए ।

तर त्यसको ठीक १० मिनेट पछि आफ्नै गल्तिका कारण बार्सिलोना पुनः गोल खान पुग्यो । अर्रिबासको फ्रिकिक समात्ने क्रममा बार्सिलोना गोलरक्षक इनाकी पेना आराउजोसँग ठोकिएपछि बल फुस्कियो र एडगर रोड्रीगेजले सहज गोल गर्दै खेललाई पुनः बराबरीमा पुर्याए।

८२औं मिनेटमा बार्सिलोनाले तेस्रो गोल गर्दै जित निश्चित गर्यो । रोबर्ट लेवान्डोस्कीको पासमा रोबर्टोले व्यक्तिगत दोस्रो गोल गरेपछि टोलीको जित निश्चित भयो ।

जित पछि बार्सिलोना १८ खेलमा ३८ अंकसहित तेस्रो स्थानमा छ । एक खेल कम खेलेको शीर्ष स्थानको जिरोनाको ४४ र दोस्रो स्थानको रियल म्याड्रिडको ४२ अंक छ।