पोखरा (हाम्रो खेलकुद) – आयोजक साहारा फुटबल क्लब १५औं आहा! रारा गोल्डकप फुटबल प्रतियोगिताको फाइनलमा पुगेको छ।
बुधबार भएको सेमिफाइनल खेलमा तिन पटक फाइनल खेलिसकेको त्रिभुवन आर्मी क्लबलाई टाइब्रेकरमा ४-३ ले पराजित गर्दै साहारा उपाधि नजिक पुगेको हो। निर्धारित ९० मिनेट गोलरहित बराबरीमा टुंगिएपछि खेल अतिरिक्त समयतर्फा धकेलिएको थियो। अतिरिक्त समयमा पनि गोल नभएपछि खेलको नतिजा टाइब्रेकरबाट लिनुपरेको थियो। यसअघि, अतिरिक्त समयको अन्त्यतिर साहाराका विदेशी खेलाडी बब्बीलाई रेफ्रीले रातो कार्ड देखाएका थिए।
टाइब्रेकरमा आर्मीका दिपक गुरुङको प्रहार बाहिरिएको थियो भने विकेश कुथुको प्रहार पनि गोल हुन सकेन। साहाराका लक्ष्मण जिसी पनि गोल गर्नबाट चुकेका थिए। आर्मीका लागि सन्तोष तामाङ, जितेन्द्र कार्की र दिप लामाले गोल गरेका थिए। साहाराको लागि भने प्रदिप गुरुङ, उत्तम गुरुङ, शिव सुबेदी र सुशन गुरुङले गोल गरेका थिए।
पुर्व-विजेता समेत रहेको साहाराले फाइनलमा मनाङ र संकटाको विजेतासंग खेल्नेछ। मनाङ र संकटाको सेमिफाइनल खेल भोलि हुनेछ।
