सिन्धु युवा कपमा न्यु खाडीचौरको जित

लामोसाँघु/सिन्धुपाल्चोक (हाम्रो खेलकुद)– सिन्धु युवा कप फुटबल प्रतियोगितको उद्घाटन खेलमा न्यु खाडीचौर युथ क्लब विजयी भएको छ । लामासाँघुस्थित बसन्तपुर मैदानमा न्यु खाडीचौरले चौतारा स्पोर्टिङ क्लबलाई १–० ले हराएको थियो ।

शनिबारका अन्य खेलमा युनाइटेड युवा क्लब पाखर र सुनकोशी युथ क्लब विजयी भएका छन् । युनाइटेडले क्षितिज युवा परिवारलाई ४–१ ले हरायो । सुनकोशीले साँगा चोक युवा क्लबलाई टाइब्रेकरमा ३–० ले हराएको थियो । निर्धारित समयमा १–१ को बराबरीपछि खेलको निर्णय टाइब्रकेरमा भएको थियो ।

युवा संघ नेपाल सिन्धुपाल्चोकलेचोकले आयोजित प्रतियोगिताको पूर्व उपप्रधानमन्त्री तथा एमाले उपाध्यक्ष भिम रावलले उद्घाटन गरेका थिए । उद्घाटनमा एन्फा उपाध्यक्ष बिरबहादुर खड्काको पनि उपस्थिति थियो । फागुन १ गते सम्म चल्ने प्रतियोगिताको विजेताले ७० हजार र दोस्रो हुने टोलीले ५० हजार रुपैयाँ प्राप्त गर्नेछ ।

नकआउटका आधारमा हुने प्रतियोगितामा आइतबार दुई खेल हुनेछन् । प्रतियोगितामा १५ टोलीको सहभागिता रहेको प्रतियोगिताका संयोजक शक्ति श्रेष्ठले बताए ।