सिमरा (हाम्रो खेलकुद) – सिमरामा जारी रुस्लान आठौं सिमरा गोल्डकप फुटबलमा प्रतियोगितामा आतबार साविक बिजेता हेटौडाको प्राइम पोलिक्लिनिक बिजय युथ क्लबले ए डिभिजन क्लब सरस्वती युथ क्लबको सामना गर्दैछ ।
पहिलो पटकको सहभागितामै सातौं सस्करणको उपाधि उचालेको बिजय युथ र सरस्वतीबिचको खेल सिमरा रंगशालामा दिउसो ३ बजे सुरु हुनेछ । रुपन्देही ११ लाई हराउदै बिजय युथले अघिल्लो बर्ष उपाधि जितेको थियो ।
प्रतियोगिताको अन्तिम आठमा सिधै प्रवेश पाएको बिजय युथले उपाधि होडमा कायम रहन सरस्वतीविरुद्ध राम्रो खेल पस्कनुपर्ने हुन्छ । सरस्वतीले यसअघि पहिलो खेलमा आयोजक नवजनजागृतिलाई पराजित गरेको थियो । सरस्वतीले आयोजकविरुद्ध २–० को जित निकालेको थियो ।
यसअघि शनिवार भएको खेलमा पाचौं सस्करणको उपबिजेता वीरगन्ज युनाईटेडले सहारा क्लबलाई १–० ले पराजित गरेको छ । प्रतिस्पर्धात्मक खेलमा सहाराविरुद्ध कठिन जित हात पार्ने क्रममा वीरगन्जका लागि बिकास राईले निर्णायक गोल गरेका थिए ।
