मछिन्द्रको जित, संकटा र एनआरटीले अंक बाँडे

काठमाडौं (हाम्रो खेलकुद) – ललित स्मृति यु-१८ लिगमा आइतवार भएको खेलमा मछिन्द्र एफसी विजयी भएको छ ।

एन्फा कम्प्लेक्स सातदोबाटोमा भएको दिनको दोस्रो खेलमा मछिन्द्रले एपिएफ माथि २-१ को जित निकालेको हो ।

६३औं मिनेटमा प्रसुन तामाङको गोलमा मछिन्द्रले सुरुवाती अग्रता लिएको थियो । तर ८९औं मिनेटमा विकास टिटूङले पेनाल्टीमा गरेको गोलमा एपिएफले बराबरी गर्यो ।

अन्तिम समयतिर गोल गरेपनि एपिएफले अंक भने हासिल गर्न सकेन । डिफेन्डर र गोलकिपरको तालमेल नमिलेपछि एपिएफ पराजित भयो ।

इन्ज्युरी समयको चौथो मिनेटमा गोलकिपरका लागि दिएको ब्याकपासमा गल्ती गरेपछि मछिन्द्रका भूपेन्द्र धरालाले खाली पोस्टमा गोल गर्दै मछिन्द्रलाई जित दिलाए ।

जित पछि ५ खेलमा ११ अंक बटुल्दै मछिन्द्र शीर्ष स्थानमा उक्लिएको छ । पराजित एपिएफ भने ५ खेलमा ७ अंक सहित पाँचौं स्थानमा छ ।

त्यसअघि दिनको पहिलो खेलमा संकटा क्लब र न्यू रोड टिम (एनआरटी) ले २-२ को बराबरी खेलेका थिए । संकटाको ३ खेलमा ३ अंक र एनआरटीको ५ खेलमा १० अंक छ ।

Latest News