दिपक बोहोरा ,पाँचथर

रेडहर्स फुटबल क्लब इलामको आयोजनामा इलाम गोल्डकपको दोस्रो संस्करण मंसिरमा हुने भएको छ ।

इलामको ठूलो टुँडिखेलमा मंसिर २२ देखि २९ सम्म प्रतियोगिता सन्चालन हुने बुधवार पत्रकार सम्मेलनमार्फत आयोजक रेडहर्स फुटबल क्लबले जनाएको छ ।

क्लबका अध्यक्ष साङ्गे योल्मोले प्रतियोगिताका लागि तयारी सुरु भएको जानकारी दिए । यसपटक इलाम गोल्डकपमा ए डिभिजनका क्लबहरु सहित ८ टोलीलाई‌ सहभागी गराउने तयारी क्लब छ ।

साविक विजेता न्युरोड टिम (एनआरटी), मच्छिन्द्र, थ्री स्टार, संकटा, त्रिभुवन आर्मी, बिर्तामोड युनाइटेड, अफ्रिकन क्लब दाउफिन्स र आयोजक रेडहर्स फुटबल क्लबको‌ प्रतियोगितामा सहभागिता रहने बताइएको छ ।

यसपटक पुरस्कार राशि दोब्बर बनाइएको छ ।
यसपटक विजेताले १० लाख र दोस्रो हुने टोलीले ५ लाख रुपैयाँ पाउने आयोजकले जनाएको छ ।

मेची पहाडमा हुने गोल्डकप प्रतियोगिताहरु मध्ये इलाम गोल्डकप पुरस्कार राशिको हिसाबले सबैभन्दा ठुलो प्रतियोगिता बन्ने छ । छिमेकी जिल्ला पाँचथर र ताप्लेजुङमा हुने बिभिन्न गोल्डकपहरुको पुरस्कार राशि ५ लाख भन्दा केहि धेरै मात्र हुने गरेको छ ।

प्रतियोगितामा ७८ लाख रुपैयाँ खर्च अनुमान गरिएको आयोजक समितिका निरोज खड्गीले जानकारी दिए । आयोजकले मुख्य प्रायोजकबाट २० लाख रुपैयाँ र तथा गेटमनीबाट १८ लाख रुपैयाँ आम्दानी हुने अनुमान गरेको छ ।