काठमाडौं (हाम्रो खेलकुद)– फिलिपिन्सविरुद्ध हुने एएफसी एसियन कप २०१९ को छनोट खेलका लागि पहिलो चरणमा नेपाली टोलीका जापानी प्रशिक्षक ग्योतोकु कोजीले बिहीबार पहिलो चरणमा ३६ खेलाडीलाई प्रशिक्षणमा बोलाएका छन् । एएफसी सोलिडारिटी कप विजेता टोलीमा रहेको २३ बाहेक कोजीले १३ खेलाडीलाई छनोटमा बोलाएका छन् ।
अखिल नेपाल फुटबल संघ (एन्फा) ले आइतबारबाट प्रशिक्षण सुरु हुने जनाएको छ । छनोटमा परेका मनाङका खेलाडीले भने पछि मात्र प्रशिक्षणमा भाग लिने बताइएको छ । मनाङले यो महिना बंगलादेशमा आयोजना हुने कमाल अन्तर्राष्ट्रिय कपमा भाग लिदैछ ।
एसियन कप छनोटको पहिलो खेल नेपाल र फिलिपिन्सबीच मार्च २८ मा फिलिपिन्समा पहिलो खेल हुनेछ । कात्तिकमा मलेसियामा एएफसी सोलिडारिटी कप जित्दा अनिल गुरुङको कप्तानीमा रहेको टोलीमा विकेश कुथु, रविन श्रेष्ठ, विराज महर्जन, अनन्त तामाङ, दीपक गुरुङ, आदित्य चौधरी, विमल घर्तीमगर, विशाल राई, रञ्जन विष्ट, हेमन गुरुङ, विक्रम लामा, कमल श्रेष्ठ रहेका थिए । त्यस्तै अञ्जन विष्ट, सुजल श्रेष्ठ, किरण चेम्जोङ, सुमन लामा, नवयुग श्रेष्ठ, देवन्द्र तामाङ, विशाल श्रेष्ठ, भरत खवास, राजेन्द्र रावल र रञ्जित धिमाल टोलीका सदस्य थिए ।
थप १३ मा चोटमुक्त भएर फर्केका रोहित चन्द देखि कर्ण लिम्बुसम्म छन् ।
अन्य खेलाडीमा एलेन न्यौपाने, युवराज खड्का, रवि पासवान, विश्व अधिकारी, विमल पाण्डे, सुनिल बल, जीतेन्द्र कार्की, मानबहादुर तामाङ, दीनेश राजवंशी, हेमन्त थापामगर र विमल बस्नेत छन् ।
