सिमरा (हाम्रो खेलकुद) – ए डिभिजनका दुई टोली मोफसलकै प्रतिष्ठित फुटबल प्रतियोगितामध्येको एक रुस्लान सिमरा गोल्डकपको उपाधिका लागि शनिबार प्रतिस्पर्धा गर्दैछन् । सिमरा गोल्डकपको आठौं संकरणको उपाधिका लागि विभागिय टोली त्रिभुवन आर्मी क्लबले सिएमजी क्लब संकटाको सामना गर्दैैछ ।
सिमरा रंगशालामा शुक्रवार आयोजित प्रि म्याच कम्फ्रेन्समा दुवै टोलीका प्रशिक्षक उपाधि भिडन्त रोमाञ्चक हुने बताएका छन् । यो सिजन संकटा र आर्मीबीच यो चौथो भेट हो । यसअघिका तीन मध्ये दुई खेल संकटा र एक खेल आर्मीले जितेको थियो ।
उपाधि जित्ने विश्वस्त देखिएपनि आर्मीका प्रशिक्षक नविन न्यौपानेले संकटा बलियो टोली भएकाले फाइनल सहज नहुने बताएका छन् । उनले उपाधि जित्नका लागि उच्च प्रदर्शन गर्नु पर्ने बताए । उनले भने,‘संकटाको आक्रमण पक्ष निकै राम्रो छ । त्यसलाई रोक्नुनै हाम्रो मुख्य ध्यान हुन पर्दछ ।’
संकटाका प्रशिक्षक सल्यान खड्गीले आर्मी बलियो टिम रहेकाले रणनिति अनुसार खेलाडीले खेल्न नसके उपाधि उचाल्न कठिन हुने बताए । उनले भने,‘आर्मीको खेलाडीको तालमेल हामीले हेरिरहेका छौं । उनीहरुको कमजोरीको फाइदा उठाउन सकेमात्र जित्न सकिन्छ । ’
आर्मीका लागि यो प्रतियोगिता यस बर्षको दसौं प्रतियोगिता हो भने संकटाले आठौं प्रतियोगिताको रुपमा सिमरा गोल्डकपको खेलिरहेको छ । यो सिजन पाँच वटा प्रतियोगिताको फाइलनमा खेलेको आर्मीले तीन उपाधि जितिसकेको छ ।
आर्मीले नेपाल कप, सुमन भोम्जन स्मृति कप र दुबही गोल्डकपको उपाधि उचालेको थियो । त्यस्तै संकटाले यसअघि नारायणघटमा विकास सिल्ड फुटबलको उपाधि जित्ने क्रममा आर्मीलाई हराएको थियो । आर्मीका कप्तान भरत खवासले संकटाविरुद्ध आफ्नो स्वभाविक खेल खेल्ने बताए ।
जारी रुस्लान सिमरा गोल्डकपमा आर्मीले हिमालयन शेर्पा र संकटाले साविक बिजेता बिजय युथ क्लबलाई २–१ ले हराउँदै एकअर्काको भेट पक्का गरेका थिए ।
