गाईघाट (हाम्रो खेलकुद)– ए डिभिजन क्लब सिएमजी क्लब संकटाले रमपम चौथो उदयपुर गोल्डकप फुटबल प्रतियोगिताको पहिलो सेमिफाइनलमा सोमबार मोरङ ११ को सामना गर्दैछ ।
रुस्लान आठौं सिमरा गोल्डकपको उपाधि जितेको दुई दिनपछि क्लब संकटा बर्षको तेस्रो उपाधि जित्ने क्रममा आजको अन्तिम चारमा भिड्दैछ । त्रिभुवन आर्मी क्लबलाई शनिबार टाइब्रेकरमा ४–२ ले हराउँदै संकटाले सिमरा गोल्ड कप जितेको थियो । उदयपुरको सेमिफाइनल पुग्ने क्रममा संकटाले धरान फुटबल क्लबलाई ३–१ ले हराएको थियो । मोरङले अर्को विभागिय टोली एपिएफलाई टाइब्रेकरमा ३–१ ले हराएर अन्तिम चारको यात्रा तय गरेको थियो । त्यसअघि बर्षको पहिलो रुपमा संकटाले नारायणघाटमा विकास सिल्ड फुटबलको उपाधि जित्ने क्रममा आर्मीलाई हराएको थियो ।
संकटाले माघ १ गते सुदुरपश्चिमाञ्चल खप्तड गोल्डकप फुटबल प्रतियोगिताको फाइनल खेलेको थियो । जहाँ टोली लक्ष्मी हुन्डाई मनाङ मस्र्याङ्दीसँग १–० ले पराजित भएको थियो । उदयपुर जिल्ला फुटबल संघको आयोजनामा प्रतियोगिता थारुहट गाइघाट रंगशालामा जारी छ । अर्को सेमिफाइनलमा मंगलबार हिमालयन शेर्पा र रुपन्देही ११ बीच प्रतिस्पर्धा हुनेछ । प्रतियोगिताको विजेताले उपाधिसहित २ लाख रुपैयाँ जित्ने छ ।
