फर्साटिकर कपको सेमिफाइनल समीकरण पूरा

सुमन अधिकारी,बुटवल

रुपन्देहीको फर्साटिकरमा जारी शुद्धोधन गाउँपालिका १२ औं फर्साटिकर कप फुटबल प्रतियोगिताको सेमिफाइनल समीकरण पूरा भएको छ ।

अन्तिम क्वाटरफाइनलमा शनिवार बुटवलको गोर्खा ब्वाइज क्लबले भारत आसामको इन्टर नर्थ इष्ट एफसीलाई ५-१ ले हराएपछि सेमिफाइनल समीकरण पूरा भएको हो।

गोर्खा ब्वाइजको जितमा फागुराम थारुले २, निशान्त न्यौपाने, सन्दीप केसी र मनिष तामाङले समान १ गोल गरेका थिए । इन्टर नर्थका टिएच चेन्ङलेले एक गोल गरेका थिए। गोर्खा ब्वाईजका फागुराम थारु प्लेयर अफ दि म्याच घोषित भएका थिए ।

आयोजक फर्साटिकर युवा क्लब, नवलपरासीको‌ भैरव एफसी, अभिषेक चर्च फुटबल क्लब यसअघि नै सेमिफाइनल पुगिसकेका छन्।

आइतवार पहिलो सेमिफाइनलमा फर्साटिकर र भैरव एफसीबिच प्रतिस्पर्धा हुने क्लबका अध्यक्ष मुकेश कुँवरले जानकारी दिए । दोस्रो सेमिफाइनल सोमवार गोर्खा ब्वाइज र अभिषेक चर्चबिच हुनेछ।

माघ २ गते फाइनल हुने प्रतियोगिताको विजेताले ३ लाख ५ हजार र दोस्रो हुने टोलीले१ लाख ५० हजार ५ रुपैयाँ प्राप्त गर्नेछ।