काठमाडौं (हाम्रो खेलकुद)- नवनियुक्त युवा तथा खेलकुद मन्त्री बब्लु गुप्ताले राष्ट्रिय महिला फुटबल टोलीले भारतमा भोक्कै यात्रा गर्नु परेको विषयमा अखिल नेपाल फुटबल संघ (एन्फा) लाई प्रश्न गरेका छन् ।

भारतमा रहेको राष्ट्रिय महिला फुटबल टोलीको यात्रा र खानाको व्यवस्थापनमा एन्फाको कमजोरी भएको सन्चारमाध्यममा समाचार आएपछि मन्त्री गुप्ताले एन्फालाई प्रश्न गरेका हुन् ।

मन्त्री गुप्ताले आज एन्फा महासचिव किरण राईलाई फोन गरेर किन राष्ट्रिय टोलीलाई भोक्कै यात्रा गराएको भन्ने प्रश्न गरेको र त्यसमा उनले प्रष्ट जवाफ दिएनन् ।

महासचिव राईले भारतमा टोलीको व्यवस्थापनको जिम्मेवारी त्यहिको फुटबल संघको हुने मन्त्रीलाई जानकारी दिदै सुरुमा व्यवस्थापनमा केही समस्या देखिए पनि अहिले समाधान भएको बताएका थिए ।

महासचिव राईले भारतलाई जितेको र त्यहाँबाट सावित्रा भण्डारी ‘साम्बा’ र प्रीति राई बाहेकको टोली सिक्किम जाने र त्यहाँको स्वतन्त्रता दिवसको दिन भारतसँग खेल्न लागेको बताए । तर, मन्त्री गुप्ताले राष्ट्रिय टोलीको यात्रा र खेलाडीलाई भोक्कै यात्रा गराएको विषयमा जोड दिएर सोधेपछि पनि त्यसमा राईले प्रष्ट जवाफ दिएनन् । मन्त्री गुप्ताले महासचिव राईलाई फोन गरेको भिडियो सामाजिक सञ्जालमा सार्वजनिक भएको‌ छ ।

व्यवस्थापकीय जिम्मेवारी सम्बन्धित फुटबल संघको भएपनि खेलाडीको यात्रा तालिका, खाने बस्ने व्यवस्थाको बारेमा पूर्ण जानकारी लिनु पर्दैन भनेर मन्त्री गुप्ताले सोधेपछि राईले जवाफ दिन सकेनन् । उनी खेलमा बढी केन्द्रित हुन खोजेपनि मन्त्री गुप्ताले राष्ट्रिय टोलीको व्यवस्थापनका बारेमा जोड दिएका थिए । उनले राई यो विषयमा भेटेर कुरा गर्नुे पनि भनेका छन् ।

इरानसहितको त्रिदेशीय अन्तर्राष्ट्रिय मैत्रीपूर्ण फुटबल प्रतियोगिताअन्तर्गत नेपाल र भारतबीच सिलोङमा हिजो साँझ ८ बजे खेल सकिएको‌ थियो ।‌ त्यो फिफा विन्डोको खेल थियो ।

त्यसपछि नेपाल र भारतबीच बिहीवारको लागि सिक्किममा अर्को अनौपचारिक मैत्रीपूर्ण खेल तय‌ थियो । तर, अहिले फिफा विन्डो विनाको मैत्रीपूर्ण खेल अब बुधवार दिउँसोको लागि नै अगाडि सारिएको छ ।

हिजो राति खेल खेलेका राष्ट्रिय खेलाडीले होटल पुगेर राम्ररी आराम गर्न नपाउँदै यात्रामा निस्कनु परेको थियो । एन्फाले आज बिहान ३:०० बजेदेखि दिउँसो २ बजेसम्म टोलीलाई भोक्कै यात्रा गराएको छ ।  विमानस्थल पुग्न विहान ३ बजे नै सिलोङबाट झन्डै १ सय किलोमिटर बसमा यात्रा गरेर टोली गुवाहाटी विमानस्थल पुगेको थियो ।

बिहान ९ बजे उडान भएपनि अघिल्लो दिन खेल खेलेका खेलाडीलाई एन्फाले केहि नखुवाई यात्रा गराएको टोलीका एक सदस्यले‌ जानकारी दिए । यसैपनि सिलोङमा टोलीलाई होस्टेलमा राख्दै अन्य टोलीभन्दा कमजोर सुविधा दिइएको प्रशिक्षक नविन न्यौपानेले नै दुःखेसो पोखेका थिए ।

आज दिउँसो २ बजे बागडोग्रा आइपुगेर खान पाएको टोलीले फेरि त्यहाँबाट १ सय ४० किलोमिटरको यात्रा तय गरेर सिक्किम पुग्नु पर्नेछ । मंगलबार राति मात्र सिक्किम पुग्ने टोलीले बुधवारनै  खेल खेल्ने तय गरिएको बताइएको छ ।

एन्फाको कमजोर व्यवस्थापनको पहिलो होइन । राष्ट्रिय टोलीकी कप्तान सावित्रा भण्डारी ‘साम्बा’, गोलकिपर एन्जिला तुम्बापो सुब्बा र प्रीति राई भने बुधवारको खेल उपलब्ध हुने छैनन् ।

साम्बा र एन्जिला गुवाहाटीबाटै क्लब ड्युटीका लागि जाने बताइएको छ । साम्बा न्युजिल्याण्डको क्लब र एन्जिला भारतकै सेथुमा‌ खेल्न जानेछिन् । प्रीति भने टोलीसँगै बागडोग्रा पुगेर नेपाल आउने र त्यसपछि जोर्डन जानेछिन् ।

फिफाले नै खेलाडीको स्वास्थ्यलाई मध्यनजर गर्दै २ खेलको बीच कम्तिमा ७२ घण्टा विश्राम दिनुपर्ने भनेको छ । तर नेपाली टोलीले ४८ घण्टा नबित्दै  भोक, निन्द्रा र लामो यात्राको सकस बीच खेल्नुपर्ने भएको छ ।