काठमाडौं (हाम्रो खेलकुद)- मलेसियाविरुद्ध हुने एएफसी एसियन कप छनोटको खेलका लागि अखिल नेपाल फुटबल संघ (एन्फा) ले नेपाली प्रशिक्षकलाई राष्ट्रिय पुरुष फुटबल टोलीको जिम्मेवारी दिने भएको छ।

म्याट रसले नेपाली राष्ट्रिय टोलीको प्रशिक्षक पदबाट राजीनामा दिएपछि छनोटमा मलेसियाविरुद्ध नेपालीलाई‌ प्रशिक्षकको जिम्मेवारी एन्फाका प्रमुख कार्यकारी अधिकृत (सिइओ ) इन्द्रमान तुलाधरले हाम्रो खेलकुद डटकमलाई जानकारी दिए।

एएफसीको प्रतियोगितामा राष्ट्रिय टोलीको प्रो लाइसेन्स प्राप्त प्रशिक्षक हुनुपर्छ। तर एन्फाले एसियाली फुटबल महासंघ (एएफसी) लाई पत्र पठाएर मलेसियाविरुद्धको खेलका लागि विना प्रो प्रशिक्षक नियुक्तको छुटको माग गरेको पनि बताए।

तुलाधरले एएफसीको स्वीकृत पछि एक पटकको लागि नेपाली प्रशिक्षकलाई नै जिम्मेवारी दिइने र भोलि प्रशिक्षकको घोषणा गर्ने पनि जनाए।

आइतबारदेखि नै नेपाली टोलीको प्रशिक्षण सुरु गर्ने भएकोले भोलि नै प्रशिक्षक चयन गरिने उनले जानकारी दिए । नेपाल र मलेसियाको खेल मंसिर २ गते मलेसियामा हुनेछ। त्यसअघि नेपाल र घरेलु टोली बंगलादेशबीच कात्तिक २७ गते मैत्रीपूर्ण खेल हुने एन्फाले सार्वजनिक गरिसकेको छ।

मलेसियापछि लाओससँगको खेलको लागि भने प्रो लाइसेन्स प्रशिक्षक नियुक्त गरिसक्ने पनि तुलाधरले जानकारी दिए।। प्रशिक्षक म्याट रसले केहि दिन अगाडि फोन मार्फत पदबाट राजीनामा दिएको तुलाधरले बताए ।

‘रसले केही दिन अघि नेपाल छोडिसक्नु भएको छ । राष्ट्रिय टोलीलाई नतिजा दिलाउन नसकेकै कारण उहाँले निरन्तरता दिन चाहानुभएन, सिइओ तुलाधरले भने, ‘उहाँको केही व्यक्तिगत कारण पनि थिए । त्यसलाई सार्वजनिक गर्न मिल्दैन।’

रसले ८ महिना मुख्य प्रशिक्षक रहँदा नेपाली टोलीले ७ खेल खेलेको थियो।‌ जसमा नेपालले मात्र १ खेल जित्दा २ मा बराबरी र ४ खेलमा हार बेहोरेको थियो । भियतनामविरुद्ध पछिल्लो खेलमा रस दुई पहेंलो कार्डको निलम्बनका कारण टचलाइनमा पनि थिएनन् ।

रसले सम्हालेपछिको पहिलो खेलमा नै नेपालले सिंगापुरलाई १-० ले हराएको थियो । त्यो नै उनको लागि उत्कृष्ट नतिजा रहयो । नेपालले हङकङ र बंगलादेशसँग गोलरहित बराबरी खेल्यो । नेपालले मलेसिया र लाओससँग १-१ र भियतनामसँग २ खेलमा हार बेहोर्यो ।