काठमाडौं (हाम्रो खेलकुद)- सहिद स्मारक ‘ए’ डिभिजन लिग सञ्चालनका लागि सुझाव पेश लागि युवा तथा खेलकुद मन्त्रालयले आज ७ सदस्यीय कार्यदल गठन गरेको छ।

अखिल नेपाल फुटबल संघ (एन्फ) का प्रमुख कार्यकारी अधिकृत इन्द्रमान तुलाधरको संयोजकत्वमा कार्यदल गठन गरिएको हो।

कार्यदलको सदस्यमा युवा तथा खेलकुद मन्त्रालयको तर्फबाट एक प्रतिनिधि, राष्ट्रिय खेलकुद परिषद (राखेप) का इन्जिनियर सविन महर्जन, ए डिभिजन क्लबबाट एनआरटीका अध्यक्ष सुन्दर नरसिंह जोशी, विभागीय टिमबाट एपिएफका जिवेश पाण्डे, एन्फाबाट गोकुल थापा र खेल विज्ञको रुपमा नविन चित्रकार रहेका छन्।

कार्यदलले भोलि देखि काम सुरु गर्ने र ५ दिनभित्र मन्त्रालयलाई प्रतिवेदन बुझाउनु पर्नेछ। युवा तथा खेलकुद मन्त्री बब्लु गुप्ताले ५० दिनभित्र लिग सञ्चालन गर्न दिएको निर्देशनलाई पालना गर्ने गरी काम गर्ने संयोजक तुलाधरले हाम्रो खेलकुद डटकमलाई जानकारी दिए।

तत्काल लिग सञ्चालनसँगै नियमित हुन नसकेको लिगलाई नियमित बनाउन सरकार, राखेप, एन्फा र क्लबहरुको जिम्मेवारी र भुमिकाको बारेमा पनि कार्यदलले सुझाव प्रस्तुत गर्ने बताइएको छ।

लिग हुन नसकेको ८ सय ७२ औं दिनमा नवनियुक्त मन्त्री गुप्ताले एन्फा पदाधिकारी र पछि एन्फा तथा क्लब प्रतिनिधिलाई बैठकको लागि आज मन्त्रालयमा बोलाएका थिए।

मन्त्री गुप्ता राखेप सदस्य सचिव टंक लाल घिसिङ सहितको पहिलो बैठक पछि क्लब प्रतिनिधि सहित दोस्रो बैठक भएको थियो।

छलफलमा क्लब र एन्फाले आ-आफ्नो धारणा राखेका थिए। क्लब र एन्फाले राखेको धारणामा कुनै नौलोपन थिएन । यो बैठकमा पनि क्लबले लिग खेल्न तयार रहेको र एन्फाले लिग गर्न तयार रहेको भन्न भने छुटाएनन्।

ए डिभिजनका सबै क्लबका प्रतिनिधिको भने यो बैठकमा उपस्थिति रहेको थिएन्। हिमालयन शेर्पा, जावलाखेल युथ क्लब र मनाङ मर्स्याङ्दी लगायतका क्लब प्रतिनिधि मन्त्रालय गएनन्।

बैठकपछि एन्फा महासचिव किरण राईले पुस ९ गते नै लिग सञ्चालनको लागि एन्फा तयार रहेको भन्दै सरकारबाट आर्थिक सहयोग र मैदानको विषयमा सहयोग जरुरी रहेको विषयमा छलफल भएको बताए।

साथै उनले मन्त्रालयले लिग सञ्चालनमा सहजीकरण गरेको भन्दै यसलाई हस्तक्षेप भन्न नमिल्ने पनि बताए।
लिग फरम्याट, खेलाडी दर्ता लगायत सामान्य प्रक्रियाको सुरुवात समेत हुन सकेको छैन । यो अवस्थामा मन्त्रालयले लिग सञ्चालनमा चासो देखाएको हो।