एजेन्सी – च्याम्पियन्स लिगमा मंगलवार बायर्न म्युनिखले १० खेलाडीमा सीमित हुँदै पनि साविक विजेता पेरिस सेन्ट जर्मेन ( पिएसजी) लाई २-१ ले हराएको छ।

बायर्नका लागि दुबै गोल लुइस डियाजले गोल गरे । डियाजले चौथो मिनेटमा गोल गर्दै बायर्नका लागि अग्रता दिलाए। त्यसपछि ३० औं मिनेटमा कमजोर डिफेन्सको फाइदा उठाउँदै उनले दोस्रो गोल थपे।

तर पहिलो हाफको अन्त्यतिर उनले पिएसजीका हाकिमीमाथि खतरनाक ट्याकल गरेपछि रातो कार्ड पाए । हाकिमी घाइते हुँदै आँसुमा मैदान छाड्न बाध्य भए।

जोआओ नेभेसले पिएसजीका लागि ७४ औं मिनेटमा गोल फर्काए। तर दोस्रो हाफभरि १० खेलाडीमा सीमित बायर्नले अग्रता जोगाएर जित पक्का गर्‍यो।

यो सिजन बायर्नले सबै प्रतियोगितामा लगातार १६ खेल जितेको छ। टोली च्याम्पियन्स लिगका चारै खेल जित्दै समूह चरणमा १२ अंक जोडेको छ।

बायर्नका प्रशिक्षक भिन्सेन्ट कोम्पानीले भने, ‘अहिले नै विजेता तय हुँदैन, तर अर्को चरणमा पुग्न यो जित धेरै महत्वपूर्ण छ।’

पिएसजीका लागि भने चोटको समस्या बढ्दै गएको छ। हाकिमीको चोट गम्भीर देखिएको छ, र उनी आगामी महिना मोरक्कोमा हुने अफ्रिका कप अफ नेसन्समा खेल्ने कि नखेल्ने अनिश्चित छ। बालोन डिओर विजेता उस्मान डेम्बेले पनि ह्यामस्ट्रिङको समस्याका कारण पहिलो हाफमै मैदान छाड्न बाध्य भए।

प्रशिक्षक लुइस एन्रिकेले भने, ‘हामी खेलाडीहरूको शारीरिक स्थिति सुधार्न प्रयास गरिरहेका छौं, तर धेरै खेलहरूका कारण यो सजिलो छैन।’

च्याम्पियन्स लिगमा मंगलवार नतिजा र अंक तालिकामा शीर्ष १५ टोली