एजेन्सी – बार्सिलोनाले बुधबार राति बेल्जियममा भएको च्याम्पियन्स लिगको खेलमा क्लब ब्रुगसँग ३-३ को बराबरी खेलेको छ।

खेल सुरुदेखि अन्त्यसम्म नै रोमाञ्चक बनेको थियो। छैंठौं मिनेटमै घरेलु टोलीले अग्रता लियो। कार्लोस फोर्ब्सले अफसाइड ट्र्याप तोड्दै बल निकोलो ट्रेसोल्डीलाई पास गरे र उनले सहजै गोल गरे।

तर बार्सिलोनाले तुरुन्तै खेलमा फर्कियो । आठौं मिनेटमा फर्मिन लोपेजको पासमा फेरेन टोरेसले गोल गर्दै खेललाई १-१ बराबरीमा बनाए।

१७औं मिनेटमा ब्रुगेले पुनः अग्रता लियो। फोर्ब्सले काउन्टर आक्रमणमा उत्कृष्ट गोल गर्दै अग्रता २–१ बनाए।

पहिलो हाफमा बार्सिलोनाका जुल्स कुनडे र एरिक गार्सियाका प्रहार पोस्टमा ठोक्कियो । ६१औं मिनेटमा लामिन यामालले फर्मिन लोपेजको ब्याक–हिल पासमा बल लिएर दुई डिफेन्डरबीचबाट बाटो अघि बढाउँदै बराबरी गोल गरे।

तर त्यसको दुई मिनेटमै क्लब ब्रुगका फोर्ब्सले फेरि गोल गर्दै ३–२ को अग्रता दिलाए। केही समयपछि रेफ्रीले ब्रुगेसलाई पेनाल्टी दिएको निर्णय गरे पनि भिएआर समीक्षापछि त्यो निर्णय उल्टाइयो।

७७औं मिनेटमा बार्सिलोनाले फेरि गोल फर्कायो। यामालको क्रस ब्रगका क्रिस्टोस जोलिसको खुट्टामा ठोकिँदै आफ्नै पोस्टमा गयो र खेल ३–३ बराबरीमा सकियो।

इन्जुरी समयमा रोमियो भर्मान्टले क्लब ब्रुगका लागि गोल गर्दै टोलीलाई फेरि अग्रता दिलाए पनि भिएआर समीक्षापछि उनको गोल फाउलका कारण रद्द भयो। यो नतिजासँगै बार्सिलोना तालिकामा ११औं र ब्रुग २२औं स्थानमा छ।

अर्को खेलमा म्यानचेस्टर सिटीले बोरुसिया डर्टमुण्डलाई ४-१ ले  पराजित गरेको छ । योससँगै डर्टमुण्डको अपराजित यात्रा समाप्त भएको छ।

सिटीका लागि फिल फोडनले २,  एर्लिङ हालान्ड र रायन चर्कीले समान १ गोल गरे। डर्टमुण्डका लागि वाल्डेमार एन्टनले सान्त्वना गोल गरे।

च्याम्पियन्स लिगमा बुधवारको नतिजा र अंक तालिका