दिपक बोहोरा/झापा

घरेलु महिला फुटबलमा विभागीय टोली टोली दबदबा रहँदै आएको छ। चाहे त्यो लिग होस वा नकआउट।

अधिकांश नकआउटको सेमिफाइनलमा पुग्ने ४ मध्ये ३ टोली विभागीय नै हुन्छन् । फाइनल त विभागीय टोलीबीच नै हुने निश्चित प्रायः नै हुन्छ।

गत वर्ष लिग सहित सबै नकआउटको उपाधि एपिएफ फुटबल क्लबले जितेको थियो। फाइनलमा पुग्ने अर्को टोली पनि विभागीय नै थियो। त्यसमध्ये कुनैमा नेपाल पुलिस क्लब र कुनैमा त्रिभुवन आर्मी फुटबल क्लबले फाइनल खेलेको थियो।

झापाको शिवसताक्षीस्थित दूधेखेल मैदानमा अहिले एलभिडी झापा महिला गोल्डकप फुटबल जारी छ। यहाँ पनि विभागीय टोलीकै दबदबा छ। पहिलो चरणमा एपिएफ, पुलिस आर्मीले एकतर्फी नतिजा निकालेर सेमिफाइनल पुगेका छन्।

सेमिफाइनल पुग्ने अर्को टोली संकटा क्लब छ। विभागीय टोलीको लगातार प्रशिक्षण रहने भएकाले अन्य क्लबले उनीहरुलाई चुनौती दिने सम्भावना कम छ।

त्यसैले महिला फुटबलमा मुख्यत विभागीय टोली बीच नै प्रतिस्पर्धा हुने हो । त्यसमा पनि अधिकांश राष्ट्रिय फुटबल टोली सदस्य रहेको एपिएफ बलियो छ ।

स्थानीय र अन्य क्लब टोलीले उत्साहका साथ प्रतिस्पर्धा गरे पनि विभागीय टोलीसँग तालमेल, रणनीति र खेलको अनुभवका कारण पछि परेका देखिन्छन्।

झापाका खेल पत्रकार रमेश समरदर्शीको भनाइमा विभागीय टोलीको बलियो प्रदर्शन केवल व्यक्तिगत क्षमताको कारण नभई संस्थागत संरचना र स्थायीत्वकै परिणाम हो।