काठमाडौं (हाम्रो खेलकुद)- नेपाल फुटबल खेलाडी संघले अखिल नेपाल फुटबल संघ (एन्फा) का विरुद्ध गरेको धर्ना प्रदर्शनमा नेपाल राष्ट्रिय तथा अन्तर्राष्ट्रिय खेलाडी संघले एकबद्धता जनाएको छ।

खेल्न पाउनुपर्छ भन्ने माग सहित फुटबल खेलाडी संघले एन्फा विरुद्ध बिहीवार धर्ना प्रदर्शन गरेको थियो।

खेलाडी संघले शुक्रवार विज्ञप्ति जारी गर्दै भनेको छ, ‘ फुटबल खेलाडीको रोजीरोटीसँग जोडिएको ए डिभिजन लिग पछिल्लो पटक सम्पन्न भएको झन्डै अडाई वर्ष भइसक्दा अर्को संस्करण सुरु हुन नसक्नु दुर्भाग्य हो।’

‘ विगतमा हुने गरेका लिगलगायतका फुटबल प्रतियोगिता खेल्नका लागि क्लबमा आबद्ध हुँदा खेलाडीहरुको जीवन केही सहज भएको थियो। यति लामो समयदेखि यसरी ए डिभिजन लिग रोकिँदा एक सय भन्दा बढीले रोजगारीकै लागि देश बाहिरिनु परेको तथ्य हाम्रो सामू छ । कतिपय व्यवसायिक नभएका खेल खेलाडीले पनि धेरैले विदेशलाई आफ्नो गन्तव्य बनाएका छन्’ खेलाडी संघका अध्यक्ष दिपक श्रेष्ठले जारी विज्ञप्तिमा भनिएको छ।

खेल्न पाउनु खेलाडीको अधिकार भएको उल्लेख गर्दै खेलाडी संघले अगाडि भनेको छ, ‘खेल आयोजना गर्नु सम्बन्धित संघको दायित्व हो। यसरी संघ दायित्वबाट च्युत हुँदा खेलाडीलगायत त्यो खेलसँग जोडिएकाहरु वेरोजगार भएका छन्।’

खेल आयोजनाका लागि आफ्नै संघ विरुद्ध उत्रनु पर्ने अवस्था सिर्जना हुनु लज्जाको विषय भएको उल्लेख गर्दै यसमा एन्फा नेतृत्वले गम्भीर भएर सोच्नु पर्ने र समस्या समाधानका लागि पहल गर्न आवश्यक रहेको जनाएको छ।’

खेलाडी संघले चाँडोभन्दा चाँडो समस्या समाधानका गर्दै फुटबल हुने वातावरण तयार पार्ने एन्फालाई आग्रह पनि गरेको छ।

अन्त्यमा फुटबल खेलाडीले आफ्नो हकका लागि चलाउने सबै खाले विरोधलगायतका कार्यक्रममा खेलाडी संघ साथ रहने पनि प्रष्ट गरेको छ।

एन्फा र १४ क्लबले यो पुसमा राष्ट्रिय लिग गर्ने र ए डिभिजन लिग अर्को वर्ष पुसमा मात्र आयोजना गर्ने संयुक्त निर्णय गरेका थिए।

फुटबल खेलाडी संघले एन्फाको साधारण सभाले यो वर्षको पुस ९ गते ए लिग गर्ने निर्णय गरेको त्यसै अनुसार गर्नुपर्ने मागसहित आन्दोलन सुरु गरेको छ। एक साता मा लिगको सुनिश्चितता नगरेमा त्यसपछि आन्दोलनलाई निरन्तरता दिने फुटबल खेलाडी संघले जनाएको छ।