रविन्द्र वाईबा, हेटौंडा

तनहुँको हैरान्स क्लबले हेटौंडामा जारी एन्फा प्रेसिडेन्ट लिगमा पहिलो जित निकालेको छ।

हेटौंडाको गौरीटार रंगशालामा आज भएको खेलमा दोलखाको टाइगर्स टिमलाई ५-२ गोलले हराउँदै हैरान्सले लिगमा पहिलो जित हासिल गरेको हो।

हैरान्सका लागि रोशन दोङले खेलको २५ औं र ३२ औं मिनेटमा गोल गरे। यस्तै समिराज थोकरले ४८ औं, विश्व लामाले ४९ औं र अनिष महर्जनले ८८ औं मिनेटमा गोल गरे।

टाइगर्सका लागि विशेष लामाले ६२ औं र ६६ औं मिनेटमा गोल गरे। हैरान्सका रोशन दोङ प्लेयर अफ दि म्याच घोषित भए।

दोस्रो खेल खेलेको हैरान्स बिहीवार सुर्खेतको काक्रेविहार युथ क्लबसँग ३-२ गोलले पराजित भएको थियो।

लिगमा समान २ खेलमस टाइगर्सले पहिलो हार बेहोरेको हो। यसअघि बिहीवार नै भएको खेलमा टाइगर्सले उदयपुरको गाईघाट फुटबल क्लबलाई २-१ गोलले हराएको थियो।

आज पहिलो खेलमा सुर्खेतको काक्रेविहार युथ क्लब र बर्दियाको जन जागृती युवा क्लबले १-१ गोलको बराबरी खेलेका छन्।

कार्केविहारका लागि आशिष चापागाईंले खेलको ३८ औं र जागृतीका लागि राजन न्यौपानेले ४६ औं मिनेटमा गोल फर्काए। कार्केविहारका सरिन जिसी प्लेयर अफ दि म्याच
घोषित भए।

लिगमा समान २ खेलमा जागृतीले जित निकाल्न सकेको छैन। जागृती यसअघि शुक्रबार धनकुटाको देउराली युथ क्लबसँग ३-१ गोलले पराजित भएको थियो। कार्केविहारले पहिलो खेल जितेको थियो।

लिग कम नकआउट आधारमा सञ्चालन भइरहेको प्रतियोगितामा १० टोली सहभागी छन् । प्रतियोगिता मंसिर २ गतेसम्म सञ्चालन हुनेछ।

प्रतियोगिताको विजेता टिमले १० लाख रुपैयाँसहित शिल्ड र दोस्रो टोलीले ५ लाख रुपैयाँ प्राप्त गर्नेछन् ।