दिपक बोहोरा/ हिमाल खरेल, झापा

एपिएफ क्लब एलभिडी झापा महिला गोल्डकप फुटबल प्रतियोगिताको फाइनलमा पुगेको छ।

विभागीय डर्बीमा त्रिभुवन आर्मी फुटबल क्लबलाई टाइब्रेकरमा ४-२ ले हराउँदै एपिएफ उपाधि नजिक पुगेको हो।

झापाको शिवसताक्षीस्थित दूधे रंगशालामा भएको दोस्रो सेमिफाइनलको इन्ज्युरी टाइममा गोल फर्काउँदै एपिएफले निर्धारण समयमा १-१ को बराबरी गरेको थियो।

७ मिनेट थपिएको इन्ज्युरीसमयको चौथो मिनेटमा कप्तान अनिता बस्नेत पेनाल्टी बक्स ठिक बाहिरबाट फ्रिकिकमा गोल गर्दै एपिएफलाई खेलमा फर्काएकी थिइन् ।

एपिएफले सोमवार हुने फाइनलमा अर्को विभागीय टोली नेपाल पुलिस क्लबको सामना गर्नेछ। आज खेलमा एपिएफले पकड बनाएपनि गोलका लागि संघर्ष गर्नु परेको थियो।

२६औं मिनेटमा एपिएफकी सरु लिम्बूले पेनाल्टी बक्स बाहिरबाट हानेको प्रहार पोष्ट छेउबाट बाहिरियो। त्यसपछि २९औं मिनेटमा आर्मीकी तुलसा बोहोराको सटिक क्रसमा विमला चौधरीले हेडर गरेको बल बारमाथि बाट गयो।

३९औं मिनेटमा एपिएफकी कप्तानको कर्नरमा रश्मि कुमारी घिसिङले गरेको भलि प्रहार आर्मीकी डिफेन्डरले क्लियर गरिन्। त्यसको एक मिनेटमै आर्मीले तीव्र काउण्टर अट्याक बनायो, तर तुलसा बोहोराको अन्जना राना मगरविरुद्धको वान भर्सेन–वान प्रयास सफल हुन सकेन।

५८औं मिनेटमा एपिएफकी रश्मिको प्रहार आर्मीकी गोलकिपर कोपिला खड्काले बचाइन्। तर ६३ औं मिनेटमा आर्मीले अग्रता लिन सफल भयो ।

डिफेन्डर निशा ठोकर र गोलकिपर अन्जना राना मगरबीचको तालमेलको नमिलेको फाइदा उठाउँदै चन्द्रा भण्डारीले नजिकैबाट फिनिसिङ गर्दै आर्मीलाई १-० को अग्रता दिलाइन्। आफैले दिएको पासमा जेनिफर राईले प्रहार गरेको बललाई चन्द्राले फाइनल टच गरेकी थिइन्।

खेलको अन्त्यतिर एपिएफले लगातार दबाब बढायो। ८१औं मिनेटमा अनिताको क्रसमा रश्मिको हेडर गोलपोष्ट बाहिरियो। इन्ज्युरी समयमा कप्तान अनिताले फ्रिकिकमा उत्कृष्ट गोल गर्दै खेललाई टाइब्रेकरमा पुर्याइन्।

त्यसपछि सिधै भएको टाइब्रेकरमा एपिएफले बाजी मार्यो । गोलकिपर अन्जनाले आर्मीका २ खेलाडीको पेनाल्टी रोकिन् । एपिएफका लागि सविता राना मगर, अनिता, निशा ठोकर र रश्मिले गोल गरे। रेनुका हमालको प्रहार आर्मीकी गोलकिपर कोपिलाले रोकिन्।

आर्मीका विमला बिक र अनिता लम्जेलले मात्रै गोल गर्न सके। विमला चौधरी र सुस्मिता चौधरीको प्रहार अन्जनाले विफल पारिन् । अन्जना ‘प्लेयर अफ द म्याच’ घोषित भइन् र १५ हजार रुपैयाँसहित ट्रफी प्राप्त गरिन्।