दिपक बोहोरा/हिमाल खरेल,बिर्तामोड

झापाको शिवसताक्षीस्थित दुधे रंगशालामा आज महिला फुटबलको महाकुम्भ आयोजना हुँदैछ । एलभिडी झापा महिला गोल्डकप फुटबल प्रतियोगिताको फाइनल खेल आज दिउँसो २ः३० बजेबाट सुरू हुनेछ ।

फाइनलमा विभागीय डर्बी एपिएफ फुटबल क्लब र नेपाल पुलिस क्लब आमनेसामने हुँदैछन् । आयोजक झापा महिला गोल्डकपका अध्यक्ष सन्तोष थोप्राका अनुुसार आजको खेलमा झापाको फुटबलप्रेमीहरूको ठुलो उपस्थिति रहने अपेक्षा गरिएको छ ।

यसैबीच, दुधे रंगशालामा आयोजित प्रिम्याच कन्फ्रेन्समा दुवै टोलीका प्रशिक्षक र कप्तानले आफ्नो टोली उपाधिका लागि पूर्ण रूपमा तयार रहेको बताएका थिए ।

पुलिसले क्वाटरफाइनलमा चर्च बोइज युनाइटेडलाई ८-० ले र सेमिफाइनलमा संकटा क्लबलाई २- ० ले पराजित गर्दै फाइनलमा स्थान बनाएको थियो ।

एपिएफले क्वार्टर फाइनलमा सिक्किम क्लबलाई ७-० को भारी अन्तरले हरायो । सेमिफाइनलमा अर्को विभागीय डर्बीमा त्रिभुवन आर्मी फुटबल क्लब सँगको १-१ को बराबरीपछि एपिएफले पेनाल्टी सुटआउटमा ४-२ जित निकाल्दै पुलिससँगको भेट पक्का गरेको‌ थियो।

आयोजक समितिका अनुसार फाइनलमा दर्शकका लागि टिकट दर सामान्यतर्फ ३ सय र ५ सय रुपैयाँ तथा भिआइपीतर्फ १ हजार रुपैयाँ तोकिएको छ ।

विजेता टोलीले १० लाख १० हजार र दोस्रो टोलीले ५ लाख रुपैयाँ प्राप्त गर्नेछ। प्रतियोगिताको सर्वोत्कृष्ट खेलाडीले १ लाख ५० हजार रुपैयाँ प्राप्त गर्नेछन् ।

त्यस्तै, प्रतियोगिताका उत्कृष्ट गोलकिपर, डिफेन्डर, मिडफिल्डर, फरवार्ड, उदीयमान खेलाडी, उत्कृष्ट प्रशिक्षक र उच्च गोलकर्ताले जनही २५ हजार रुपैयाँ पुरस्कार पाउने छन् ।