काठमाडौं(हाम्रो खेलकुद) – जेम्स थन्डरबोल्ट्स नेपाल स्कुल फुटबल लिग (एनएसएफएल) को च्याम्पियन बनेको छ । फाइनलमा छिमेकी प्रतिद्वन्द्वी एलए स्नो लिओपर्ड्सलाई पराजित गर्दै थन्डरबोल्ट्सले उपाधिसँगै ५ लाख रुपैयाँ प्राप्त गर्यो ।

ललितपुरको धापाखेलस्थित जेम्स स्कुलको खेलमैदानमा शनिबार भएको फाइनलमा घरेलु टोली थन्डरबोल्ट्सले एलए स्नो लिओपर्ड्समाथि ४–३ को रोमान्चक जित दर्ता गरेको हो । दोस्रो हाफको अन्त्यतिर मैदान प्रवेश गरेका आर्यन अमात्यले निर्धारित ८० मिनेटको खेलको इन्ज्युरी समयमा निर्णायक गोल गर्दै उपाधि दिलाए । लिटिल एन्जल्स स्कुलको टिम स्नो लियोप्यार्ड्सले लिग चरण र क्वालिफायरमा थन्डरबोल्ट्सलाई पराजित गरेपनि फाइनलमा भने घरेलु टोलीले बाजी मार्यो ।

फ्लडलाइट्समा खेलाइएको फाइनलमा घरेलु टोलीले सानदार सुरुवात गरेको थियो । ३४ मिनेटभित्र नै ग्रेमन श्रेष्ठको दुई तथा सप्रित शेर्पाको एक गोलमा थन्डरबोल्ट्सले ३–० को अग्रता लियो । तर एलएका देवराज कटवालले पहिलो हाफको अन्त्यतिर गोल गर्दै खेलमा फर्कने संकेत दिए । दोस्रो हाफमा अनुप खत्रीले दुई गोल गरेपछि एलएले ६५ औं मिनेटमा खेल बराबर गर्न सफल रह्यो । इन्ज्युरी समयमा आर्यनले प्रतियोगितामा नवौं गोल गर्दै उपाधि छिनोफानो गरे ।

करिब तीन महिना सञ्चालित प्रतियोगितामा आठ स्कुलका टिम सहभागी थिए । एलएले लिग चरणका सातै खेल जितेको थियो भने जेम्सले ५ जित, १ बराबर र १ हारको नतिजा निकालेको थियो। रातो बंगलाको रेड पान्डाज र डीएभीको सुपर डाँफेज प्ले–अफसम्म पुगेका थिए ।

फाइनलसहित ९ खेलमा १७ गोल गरेका अनुप खत्री सर्वाधिक गोलकर्ताको अवार्ड जिते । देवराज कटवालले मोस्ट भ्याल्युएबल अवार्ड हात पारे । दुवै खेलाडी एलएका हुन् ।