रविन्द्र वाईबा, हेटौंडा

एन्फा प्रेसिडेन्ट लिगमा बाराको नवजागृती युवा क्लबले पहिलो र सुर्खेतको काक्रेविहार युथ क्लबले दोस्रो जित निकालेको छ।

हेटौंडाको गौरीटार रंगशालामा आज भएको खेलमा उदयपुरको गाईघाट फुटबल क्लबलाई २-० गोलले हराउँदै लिगमा नव जागृतीले पहिलो जित दर्ता गर्यो ।

दोलखाको टाइगर्स टिमलाई १-० गोलले हराउँदै सुर्खेतको काक्रेविहार युथ क्लबले लिगमा दोस्रो जित हासिल गरेको हो।

नव जागृतीका लागि राजन न्यौपानेले खेलको ५७ औं र विकास दर्लामीले ६२ औं मिनेटमा गोल गरे। जन जागृतीमा अविनाष स्याङ्तन प्लेयर अफ दि म्याच घोषित घोषित भए।

नव जागृतीले शनिवार काक्रेविहारसँग १-१ को बराबरी खेलेको थियो। लिगमा २ खेल खेलेको गाईघाट बिहीवार दोलखाको टाइगर्स टिमसँग २-१ गोलले पराजित भएको थियो।

आजको दोस्रो खेलमा काक्रेविहारले टाइगर्स टिमलाई १-० गोलले हरायो ।‌ काक्रेविहारका लागि रोमन भुजेलले ६३ औं मिनेटमा गरेको गोल नै निर्णायक बन्यो।काक्रेविहारका अमित लामा प्लेयर अफ दि म्याच घोषित भए।

लिगमा ३ खेल खेलेको काक्रेविहारले बिहीवार तनहुँको हैरान्स क्लबलाई ३-२ गोलले पराजित गरेको थियो । टाइगर्सले लिगमा दोस्रो हार बेहोरेको हो।

टाइगर्सले बिहीबार गाईघाट फुटबल क्लबलाई २-१ गोलले हराएको थियो र अर्को खेलमा हैरान्स क्लबसँग ५-२ ले पराजित भएको थियो।

लिग कम नकआउट आधारमा सञ्चालन भइरहेको प्रतियोगितामा १० टोलीलाई २ समुहमा विभाजन गरिएको छ। दुई समुहको विजेता र उपविजेता गरी ४ टोलीले राष्ट्रिय लिग प्रतियोगितामा सहभागी जनाउन पाउनेछ।

मंसिर २ गतेसम्म चल्ने प्रतियोगिताको विजेता टोलीले १० लाख र दोस्रो टोलीले ५ लाख रुपैयाँ प्राप्त गर्नेछ ।