हिमाल खरेल/ दिपक बोहोरा, बिर्तामोड

एलभिडी झापा महिला गोल्ड कप फुटबल प्रतियोगिताले घरेलु महिला नकआउटको टिकट बिक्रीबाट हालसम्मकै सर्वाधिक रकम आम्दानी गरेको छ ।

दर्शकको उल्लेख्य उपस्थिति रहेको प्रतियोगिताका हरेक खेलमा रंगशाला भरिभराउ रहेको थियो । आयोजक समितिका अध्यक्ष सन्तोष थोप्राका अनुसार प्रतियोगिता अवधिभर ५८ लाख ३ हजार रुपैयाँको टिकट बिक्री भएको छ ।

फाइनल खेलमा मात्र ३० लाख २ हजार ४ सय रुपैयाँको टिकट बिक्री भएको हो । त्यस्तै, पहिलो सेमिफाइनलमा ५ लाख ५० हजार ७ सय रुपैयाँ र अन्तिम सेमिफाइनल खेलमा ११ लाख ५ हजार ५ सय रुपैयाँको आम्दानी भएको आयोजकले जनाएको छ ।

त्यसअघि, क्वार्टर फाइनलका ४ खेलमा टिकट बिक्रीबाट ११ लाख ४४ हजार ४ सय रुपैयाँ आम्दानी भएको आयोजकले जनाएको छ । उद्घाटन खेलको दिन २ लाख ८८ हजार रुपैयाँ टिकट बिक्रीबाट संकलन भएको थियो ।

झापाको शिवसताक्षीस्थित दुधे रंगशालामा सम्पन्न फुटबल प्रतियोगितामा दर्शकको उपस्थिति बाक्लो रहेको थियो । खेल हेर्न स्थानीयदेखि आसपासका जिल्लाबाट दर्शकको उपस्थिति रहेको थियो ।

महिला फुटबलप्रति बढ्दो चासो, स्थानीय खेलाडीको सहभागिता र विभागीय टोलीको प्रतिस्पर्धाले दर्शकको आकर्षण बढेको अध्यक्ष थोप्राले बताए ।

अध्यक्ष थोप्राले भने, ‘दर्शकको उत्साहले हामीलाई थप जिम्मेवारी बढाएको छ । महिला फुटबललाई अझै मजबुत बनाउने हाम्रो लक्ष्य हो । टिकट बिक्रीबाट प्राप्त रकम प्रतियोगिता सञ्चालन, खेलाडी प्रोत्साहन र मैदान व्यवस्थापनमा प्रयोग गरिनेछ ।’

कात्तिक २४ गते सम्पन्न प्रतियोगिताको क्वार्टर फाइनलका खेलहरुमा साधारणतर्फ १ सय र २ सय तथा भिआइपीतर्फ ६६ जनालाई १ हजार रुपैयाँ टिकट दर तोकिएको थियो ।

त्यस्तै, सेमिफाइनलका दुई खेलमा साधारणतर्फ २ सय र ३ सय तथा भिआइपीतर्फ ६६ जनालाई १ हजार रुपैयाँ तथा फाइनलमा साधारणतर्फ ३ सय र ५ सय तथा भिआइपीतर्फ ६६ जनालाई १ हजार रुपैयाँ टिकट दर तोकिएको थियो

प्रतियोगिताको उपाधि नेपाल पुलिस क्लबले जित्यो । मिना देउवाको गोलमा एपिएफलाई १-० ले हराउँदै पुलिसले १० लाख १० हजार रुपैयाँ हात पार्यो । कात्तिक १७ गते सुरु भएको प्रतियोगितामा ८ टोलीको सहभागिता थियो ।