काठमाडौं (हाम्रो खेलकुद)- अखिल नेपाल फुटबल संघ (एन्फा) ले १ सय २० दिनभित्र सहिद स्मारक‘ए’ डिभिजन लिग सुरु गर्न सहमति जनाएको छ।

युवा तथा खेलकुदमन्त्री बब्लु गुप्ताले बोलाएको लिगका सरोकारवालाहरुसँगको बैठकमा एन्फा महासचिव किरण राईले तयारीका लागि १ सय २० दिन भयो भने ए डिभिजन लिग गर्न सक्ने बताएका थिए।

मन्त्री गुप्ताले एन्फालाई मिति प्रस्ताव गर्न र त्यसपछि आफूले क्लबसँग छलफल गर्ने बताएपछि एन्फा महासचिव राईले १ सय २० दिनको प्रस्ताव राखेका थिए।

मन्त्री गुप्ताले भने,‘अहिले एन्फाले यो मितिमा ए डिभिजन लिगको मिति प्रस्ताव गर्नुस् । म त्यही मितिमा क्बलहरुसँग प्रस्ताव गर्छु। यसका लागि क्लबसँग भोलि बैठक पनि बस्छु।’

त्यसपछि मन्त्रीले दबाब दिएपछि अध्यक्ष पंकज विक्रम नेम्वाङ र महासचिव राई समय सिमा तोक्न बाध्य भएका थिए। त्यसअघि राईले क्लबहरु खेल्न तयार भए एन्फा लिग गर्न तयार रहेको बताएका थिए।

‘क्लब खेल्न चाहन्छ भने राष्ट्रिय लिग होल्ड गरेर भए पनि ए डिभिजन गराउँछौं,’ राईले भने। एन्फालाई मिति तोक्दैमा समस्या नहुने उनले बताए।

छलफलमा एन्फा अध्यक्ष नेम्वाङ र महासचिव राई, ए डिभिजनका ३ विभागीय टोली, एनआरटीका सुन्दर नर सिंह जोशी र मच्छिन्द्रका अध्यक्ष अनिल श्रेष्ठ, नेपाल फुटबल खेलाडी संघका अध्यक्ष विक्रम लामासहितको टोली सहभागी थियो।

मच्छिन्द्रका अध्यक्ष श्रेष्ठले ए लिग खेल्ने तयारीका लागि कम्तीमा ३ महिना समय चाहिने बताएका थिए।
एनआरटीका अध्यक्ष जोशीले यो पटक होम एण्ड अवे लिग नहुने भएपनि ए डिभिजन लिग डबल राउन्डमा गर्ने प्रस्ताव राखेका थिए।

फुटबल खेलाडी संघका अध्यक्ष लामाले लिग फागुन २१ अघि नै सुरु गर्न उपयुक्त हुने बताए । ‘निर्वाचनअघि नै लिग सुरु गरौं,’ उनले भने,’त्यसपछि निर्वाचनमा स्थगित गरेर पछि सुरु गरौं।’