रविन्द्र वाईबा , हेटौंडा

कास्कीको लालीगुराँस एसोसिएसनले एन्फा प्रेसिडेन्ट लिगमा दोस्रो जित निकालेको छ।

हेटौंडाको गौरीटार रंगशालामा आज भएको खेलमा काठमाडौंको चित्लाङ एफसीलाई ३-० गोलले हराउँदै लालीगुराँसले लिगमा दोस्रो जित हासिल गरेको हो।

लालीगुराँसका लागि लछु थापाले ३८ औं, आशिष गुरुङले ५६ औं र सुलेमन थापा मगरले ८० औं मिनेटमा गोल गरे। विजयी टोलीका लछु प्लेयर अफ दि म्याच घोषित भए।

लिगमा ३ खेल खेलेको लालीगुराँसले २ खेल जितेको छ भने एक खेल बराबरी खेल्दै ७ अंक जोडेको छ। समान ३ खेलमा चित्लाङले भने पहिलो हार बेहोरेको छ। चित्लाङले ४ अंङ्क जोडेको छ।

आज दोस्रो खेलमा कैलालीको विजय स्पोर्ट्स र बर्दियाको जन जागृतीले १-१ गोलको बराबरी खेलेका छन्।‌ विजय स्पोर्ट्सका लागि अरोन थापाले ४१ औं र जन जागृतीका लागि हरिहर बुढा मगरले ९४ औं मिनेटमा बराबरी गोल गरे। जन जागृतीका हरिहर प्लेयर अफ दि म्याच घोषित भए।

लिगमा ४ खेलमा अपराजित यात्रालाई कायम गरेको विजय स्पोर्ट्सले ३ खेलमा बराबरी र १ खेलमा मात्र जित निकालेको छ। विजयको ५ अंक छ। ३ खेलमा जन जागृतीले जित निकाल्न सकेको छैन। जन जागृती समूह ए मा १ अंक जोड्दै पुछारमा छ।

लिग कम नकआउट आधारमा सञ्चालन भइरहेको प्रतियोगितामा १० टिम सहभागी छन् । प्रतियोगिता आगामी मंसिर २ गतेसम्म सञ्चालन हुनेछ। प्रतियोगिताको विजेता टिमले १० लाख र ५ लाख रुपैयाँ प्राप्त गर्नेछ ।