काठमाडौं (हाम्रो खेलकुद)- सहिद स्मारक ए डिभिजन क्लबले सरकारसँग होम‌ र ट्रेनिङ ग्राउन्ड उपलब्ध गराइदिएको खण्डमा आफूहरु लिग खेल्न तयार रहेको बताएका छन्।

युवा तथा खेलकुद मन्त्री बब्लु गुप्ताले बोलाएको बैठकमा आज क्लबहरुले यस्तो माग राखेका छन् । सहभागी सबैले आ आफ्नो भनाई राखेपछि मन्त्री गुप्ताले सिमित साधन श्रोत भएकाले सम्झौता गरेर लिग गर्नु पर्ने बताए ।

उनले सरकारले के गर्दियो भने तपाईंहरु खेल्न तयार भनेर प्रश्न गरेका थिए। हिमालयन शेर्पा क्लबका अध्यक्ष कर्मा छिरिङ शेर्पाले सरकारले लिजमा होम र ट्रेनिङ उपलब्ध गराउन माग गर्दा सबै त्यसमा समर्थन गरेका थिए। मन्त्री गुप्ताले दोहोराएर सबैको भनाई त्यहि भनेर सोध्दा सोही जवाफ दोहोरिएका थिए।

मन्त्रीले मन्त्रालयमा छलफल गरेर पुनः क्लबहरुलाई बोलाउने जानकारी दिदैं छलफल अन्त्य गरेका थिए।
सहभागी अधिकांशले लिग नहुनुमा एन्फालाई दोष दिएका थिए।

अखिल नेपाल फुटबल संघ (एन्फा) ले हिजोको छलफलमा १ सय २० दिनभित्र ‘ए’ डिभिजन लिग सुरु गर्न सकिने बताएपछि त्यसैका विषयमा थप छलफल र सहमतिको प्रयासका लागि मन्त्री गुप्ताले ए डिभिजनका १४ क्लबका प्रतिनिधिलाई डाकेका थिए । आज बैठकमा ए डिभिजनका अंधिकाश क्लबका प्रतिनिधिको उपस्थिति थियो।

एन्फा पूर्व अध्यक्ष समेत रहेका शेर्पाले लिगको मिति तोक्नु ठूलो कुरा नभएको जनाउँदै क्लब लाइसेन्सको प्रकिया पूरा गरेर मात्र लिग गर्नु औचित्यपूर्ण हुने बताएका थिए। उनले लाइसेन्स प्राप्त गर्ने प्रक्रिया मन्त्रीलाई जानकारी गरेका थिए। अधिकांश क्लबले शेर्पाको भनाईमा सहमति जनाएका थिए।

मन्त्री गुप्ताले हिजो लिगका सरोकारवाला एन्फा, ए डिभिजन क्लब र नेपाल फुटबल खेलाडी संघका प्रतिनिधिलाई बोलाएका थिए। जसमा एक डिभिजन ३ विभागीय नेपाल पुलिस क्लब, त्रिभुवन आर्मी क्लब, एपिएफ फुटबलसहित मच्छिन्द्र क्लब र एनआरटीको उपस्थिति थियो।