पोर्चुगल पराजित, रोनाल्डोलाई रातो कार्ड

एजेन्सी – पोर्चुगलले २०२६ विश्वकपको छनोटमा बिहीवार दोहोरो मार बेहोरेको छ। आयरल्याण्डसँग २-० ले पराजित भएपछि विश्व कपमा स्थान सुरक्षित गर्न प्रतीक्षा गर्नुपर्ने भएको छ। त्यस्तै खेलमा कप्तान क्रिस्टियानो रोनाल्डोले रातो कार्डको सामना गरे।

रोनाल्डोले अन्तर्राष्ट्रिय फुटबलमा पहिलो पटक रातो कार्डको सामना गरेका हुन् । घरेलु टोलीका ट्रोय प्यारोटले पहिलो हाफमै दुई गोल गर्दै आयरल्याण्डलाई बलियो अवस्थामा पुर्याए । उनले १७ औं र पहिलो हाफको अन्तिम मिनेटमा गोल गरे।

खेलको ६०औँ मिनेटमा रोनाल्डोले डारा ओ’शियाको ढाडमा कुहिनो हानेको भन्दै रेफ्रीले सुरुमा पहेँलो कार्ड देखाए। तर भिएआर निरिक्षणपछि त्यसलाई रातो कार्डमा परिवर्तन गरियो। २ सय २६औँ खेल खेलिरहेका रोनाल्डोका लागि यो पहिलो अन्तर्राष्ट्रिय रातो कार्ड हो।

यदि पोर्चुगलले जितेको भए एक खेल बाँकी रहँदै नै विश्वकपमा स्थान सुनिश्चित हुन्थ्यो । तर प्यारोटको दोहोरो गोलले रोबर्टो मार्टिनेजको टोलीलाई रोकिदियो । यसले आयरल्याण्डको आशा जीवित राखेको छ।

अब आइतबार आर्मेनियासँगको खेलमा रोनाल्डो खेल्ने छैनन् । उनको निलम्बन अवधि भने अनुशासन समितिले तय गर्नेछ। आयरल्याण्डले आइतबार हंगेरीलाई हराउन सके प्ले–अफ स्थान पक्का हुने सम्भावना छ।