दिपक बोहोरा, पाँचथर

मिक्वाखोला गाउँपालिका–४ साँवास्थित फुङफुङदेन झरना पर्यटन विकास समितिले यस वर्ष फुटबल प्रतियोगिताका लागि अनौठो निर्णय गरेको छ। फुटबल प्रतियोगिताको विजेतालाई नगद होइन, अलैँची पुरस्कार दिने भएको छ।

समितिका अध्यक्ष विजय साँवाका अनुसार पहिलो पुरस्कार ३ लाख २ हजार ८२ रुपैयाँ बराबरको अलैँची र दोस्रो पुरस्कार १ लाख ५२ हजार ८२ रुपैयाँ बराबरको अलैँची टोलीले प्राप्त गर्नेछ।

ताप्लेजुङलाई ‘अलैँचीको राजधानी’ मानिने भएकाले स्थानीय उत्पादनलाई खेलसँग जोडेर प्रचार गर्ने उद्देश्यले यस्तो निर्णय गरिएको साँवाले बताए। पुरस्कारका रूपमा दिइने अलैँची यस समय व्यापारीहरू गाउँमै आएर किन्ने भएकाले टोलीले तुरुन्तै बिक्री गर्न सहज हुने आयोजकको भनाइ छ।

मंसिर ७ देखि ११ गतेसम्म फुङफुङदेन झरनाको काखमा हुने प्रतियोगिता केवल फुटबल मात्र होइन, स्थानीय पर्यटन, संस्कृति र कृषि–उत्पादनसँग जोडिएको कार्यक्रमका रुपमा हुँदैछ। प्रसिद्ध फुङफुङदेन झरना हेर्न आउने आन्तरिक तथा बाह्य पर्यटकका लागि यो प्रतियोगिताले थप आकर्षण ल्याउने अपेक्षा गरिएको छ।

कोषाध्यक्ष सुकबहादुर साँवाका अनुसार आगन्तुक र विशिष्ट अतिथिलाई पनि अलैँचीजन्य उत्पादन विशेषगरी अलैँची चिया मायाको चिनोका रूपमा प्रदान गरिनेछ। ‘अलैँची स्वास्थ्यबद्र्धक पनि भएकाले स्थानीय उपहारमै जोडिएको छ,’ उनले भने।

कोशी प्रदेशका उद्योग तथा कृषी मन्त्री खगेनसिंह हाङ्गामले फुटबल, अलैँची र पर्यटनलाई एकैथरी जोड्ने यो निर्णयप्रति प्रशंसा व्यक्त गर्दै यसको देशभर उदाहरणीय प्रभाव पर्ने धारणा व्यक्त गरेका छन्।

कृषि ज्ञान केन्द्रका अनुसार ताप्लेजुङमा ४ हजार ५ सय हेक्टरमा अलैँची खेती हुन्छ र वार्षिक उत्पादन २ हजार ४ सय मेट्रिकटन पुग्छ। यसैले अलैँचीलाई पुरस्कारमा समावेश गर्नु स्थानीय पहिचान, किसानको मेहनत र आर्थिक गतिविधिलाई समर्थन गर्ने प्रयास मानिएको छ।