काठमाडौं (हाम्रो खेलकुद)- एसियन कप छनोट चरण पार गर्ने संभावना समाप्त भएको नेपाली पुरुष फुटबल टोलीले आज मलेसियासँग खेल्दैछ। खेल नेपाली समयअनुसार साँझ ६:४५ बजे सुरु हुनेछ।

दशरथ रंगशालालाई एसियन फुटबल महासंघ (एएफसी) ले अयोग्य ठहर गरेको कारण मलेसियासँगको घरेलु खेल खेल्न नेपाली टोली मलेसिया पुगेको हो। पहिलो लेगमा नेपाल मलेसियासँग २-० पराजित भएको थियो

मलेसियासँगको हार मात्र होइन। नेपालले पछिल्लो ७ खेलमा जित निकाल्न सकेको छैन। नेपालले गत मार्चमा सिंगापुरलाई १-० ले हराएपछि ४ खेलमा हार र ३ खेलमा बराबरी नतिजा निकालेको थियो ।

नेपाल भियतनामसँग २ पटक तथा मलेसिया र लाओससँग १/१ पटक पराजित भएको छ। बंगलादेशसँग २ पटक बराबरीमा र हङकङसँग गोल रहित बराबरी खेलेको थियो। त्यसैले पनि नेपाल जितको दबाबमा रहनेछ।

मलेसियाविरुद्धको यो खेलको तयारीका लागि नेपालले बंगलादेशसँग मैत्रिपूर्ण खेल खेलेर मलेसिया पुगेको हो। जहाँ नेपालले २-२ को रोमाञ्चक बराबरी नतिजा निकालेको थियो। सो खेलमा रोहित चन्द र अनन्त तामाङले गोल गरेका थिए।

जारी छनोटमा नेपालले यसअघि खेलेको ४ खेल प्रशिक्षक म्याट रसको प्रशिक्षणमा‌ खेलेको थियो। यो पटक भने हरि खड्काको नेतृत्वमा रहनेछ। प्रशिक्षकको रुपमा उनको यो दोस्रो खेल हो।

आजको खेलमा पनि यसअघि जस्तै फ्रन्टलाइन नेपालको लागि चिन्ताको विषय हो। स्ट्राइकरले आफ्नो जिम्मेवारी निभाउन सकिरहेका छैनन्। बंगलादेश‌ विरूद्धको खेलमा नेपालले २-२ को बराबरी खेल्दा पनि रोहित र अनन्तले गोल गरेका थिए। डिफेन्समा पनि नेपाल सजग हुनुपर्ने देखिएको छ।

मलेसिया १२ अंक सहित समूहको शीर्षस्थानमा रहेको छ। भियतनासँग ९ अंक छ। छनोटबाट बाहिरिसकेका लाओससँग ३ र नेपाल अंकबिहिन छ।