काठमाडौं (हाम्रो खेलकुद)- नेपाल फुटबल खेलाडी खेलाडी संघपछि डिभिजन क्लबहरुले पनि आज अखिल नेपाल फुटबल संघ (एन्फा) विरुद्ध प्रदर्शन गर्ने भएका छन्।

एन्फाले ए डिभिजन लिगका‌ विषयमा छलफल गर्न आज १४ क्लबलाई डाकेको छ । बैठकअघि ए, बि र सि डिभिजनका क्लबले ३ बुँदे एन्जेन्डासहित धर्ना प्रदर्शन गर्ने बताइएको छ।

लिगका सबै प्रतियोगिता समयमै गर्न दबाब दिन, ए डिभिजन क्लबहरूसंगको सम्झौता कार्यान्वयन गर्न र
अन्तराष्ट्रिय मापदण्ड अनुसार लिग प्रतियोगिता संचालन गर्न भन्ने ३ बुँदे मागसहित क्लबहरुले प्रदर्शन गर्ने लागेका हुन्।
ए,बी र सी डिभिजनका क्लबले एन्फा विरुद्ध प्रदर्शनको तयारी गरेको ए डिभिजन टोली हिमालय शेर्पा क्लबका अध्यक्ष कर्मा छिरिङ शेर्पाले जानकारी दिए । प्रदर्शन बिहान ९ बजे सुरु गर्ने बताइएको छ।

‘अलग अलग वर्षमा होइन एकै वर्षमा ए, बी र सी डिभिजनका लिग हुनुपर्छ भन्ने हाम्रो माग रहन्छ, एन्फाका पूर्व अध्यक्ष समेत रहेका शेर्पाले भने,’ प्रर्दशनसँग एन्फाले बोलाएको बैठकमा पनि बस्छौं। बाँकी क्लबका साथीहरुले धर्नालाई जारी राख्नु हुनेछ।’ ए,बी र सी डिभिजनमा समान १४ क्लब छन्।

एन्फा र क्लबबीच कात्तिक १७ गते पुसमा राष्ट्रिय लिग गर्ने र ए डिभिजन लिग अर्को वर्ष मात्र गर्ने सहमति भएपछि खेलाडी संघ एन्फा विरुद्ध आन्दोलित भएको थियो। खेलाडी संघले भने यहि वर्ष ए डिभिजन लिग हुनु पर्ने माग राख्दै धर्ना गरेको थियो।

त्यसपछि युवा तथा खेलकुद मन्त्री बब्लु गुप्ताले फुटबलका सरोकारवालासँग सामूहिक र अलग अलग छलफल चलाएका थिए। एन्फाले क्लबहरु तयार भए १ सय २० दिनमा ए डिभिजन लिग सुरु गर्ने सक्ने बताएको थियो।

ए डिभिजन क्लबहुरुले मन्त्री गुप्ता सँग होम र ट्रेनिङ ग्राउन्ड उपलब्ध गराएमा लिग खेल्न सकिने बताएको थियो। त्यसपछि एन्फाले पुनः ए डिभिजनबा बारेमा छलफल गर्न आज ए डिभिजन क्लबलाई बैठकमा बोलाएको हो।