काठमाडौं (हाम्रो खेलकुद)- अखिल नेपाल फुटबल संघ (एन्फा) का उपाध्यक्ष विराटजंग शाहीले आगामी निर्वाचनमा एन्फा अध्यक्षमा उम्मेदवारी दिने घोषणा गरेका छन्।

नेपाली फुटबलका विद्यमान बेथिति र विसंगतीबाट मुक्त नगर्ने हो भने नेपालमा फुटबल इतिहासको पानामा सीमित हुने उल्लेख गर्दै सुशासन स्थापना गर्दै नेपाली फुटबलको ओरालो लागेको यात्रालाई रोक्न र यसको गुमेको गरिमा फर्काउन इमान्दार र सक्षम नेतृत्व पहिलो आवश्यकता रहेको शाहीले औल्याएका छन्।

शाहीले आइतवार लामो विज्ञप्तिमा भनिएको छ, ‘ नेपाली फुटबलको यही आवश्यकता पूर्तिका लागि म, पूर्व राष्ट्रिय खेलाडी विराट जग शाही एन्फाको आगामी निर्वाचनमा अध्यक्ष पदका लागि आफ्‌नो उम्मेदवारी घोषणा गर्दछु।’

एउटा फुटबल खेलाडीका लागि देशको जर्सी छातीमा टाँसेर राष्ट्रिय गान गाउनु भन्दा ठूलो गर्वको क्षण जीवनमा अरू केही नहुने जनाउँदै उनले एक पूर्व अन्तर्राष्ट्रिय खेलाडीका रूपमा आफूले त्यो गौरवको अनुभूति गरेको बताएका छन्।

‘तर, आज जब म एन्फाको वर्तमान उपाध्यक्ष र पूर्व कोषाध्यक्षको जिम्मेवारीबाट पछाडि फर्केर हेर्छु, नेपाली फुटबलको वर्तमान दूरावस्थाले मेरो मन चसक्क पोल्छ। एउटा खेलाडीका रुपमा गौरवले चौडा हुने छाती फुटबलको वर्तमान दूरावस्थाका बीच पदाधिकारी हुँ भन्दा खुम्चन्छ,’ विज्ञप्तिमा‌ बनिएको छ।

शाही वर्तमान एन्फा अध्यक्ष पंकज विक्रम नेम्वाङको प्यानलबाट उपाध्यक्षमा निर्वाचित भएका थिए। तर निर्वाचित भएको केही महिनापछि नै उनी नेम्वाङको विपक्षमा रहँदै आएका छन्।

एन्फा कार्यसमितिमा प्रष्ट दुई समूह छन् । वर्तमान कार्यसमितिको ४ वर्षे कार्यकाल २०८३ असारमा पूरा हुँदैछ।