झापा (हाम्रो खेलकुद)– नेपाली राष्ट्रिय फुटबल टोलीका पूर्व कप्तान हरि खड्काका लागि झापा चन्द्रगढीको मुनाल क्लब एउटा समान्य क्लब मात्र होइन । उनका लागि क्लब दोस्रो घर बराबर छ । जहाँ उनको भावना जोडिएको छ । त्यहि क्लबबाट फुटबलका गुण सिकेका हरिले राष्ट्रिय, अन्तर्राष्ट्रिय स्तरमा नाम र दाम कमाए ।

नेपालका लागि सर्वाधिक गोल गर्ने दुई खेलाडीमध्ये हरि एक हुन् । उनले र निराजन रायमाझीले समान १३ अन्तर्राष्ट्रिय गोल गरेका छन् । नेपाल पुलिस क्लबमा डेढ दशकभन्दा बढी समय बिताएका हरि व्यवसायिक रुपमा पनि सफल खेलाडी हुन् । पुलिस जानुअघि एनआरटीबाट समेत खेलेका हरिले केही समय मोहन बगानमा पनि बिताएका थिए ।

तर, जति राम्रो खेलाडीले पनि बुट त एक दिन थन्काउँनै पर्छ, उनले पनि बुट थन्काएको दशक पुग्न थालिसक्यो । तर, फुटबल नशानशामा छ । भुमिका फेरिएको छ, तर फुटबलको लत बदलिएको छैन । उनी एएफसीका ए लाइसेन्स प्राप्त प्रशिक्षक हुन् । यति बेला हरि घर पुगेका छन् । उनले फुटबल सिकेको मुनाल क्लब अन्तर्गत रहेको चन्द्रगढी फुटबल एकेडेमीलाई सहयोग गर्न उनी एक महिनाको फरकमा दोस्रो पटक यहाँ आइपुगेका हुन् ।

एट्लान्टिक स्पोर्टस मेनेजमेन्टमार्फत केही महिनाअघि एसी मिलान क्याम्प चलाउने अनुभव बटुलेका हरि चन्द्रगढी एकेडेमीलाई खेल समाग्री हस्तान्तरण गर्न आइपुगेका हुन् । एट्लान्टिकका प्रबन्धक निर्देशक रहेका हरिले एसियाली फुटबल महासंघ (एएफसी) बाट प्राप्त समाग्री एकेडेमीलाई आज हस्तान्तरण गरे । जसमा ७५ जर्सी सेट, ७५ टिसर्ट र १० वटा फुटबल छन् ।

अहिले समाग्री हस्तान्तरणमा हरि निमित्त मात्रै हुन् । गत महिना उनले १८ बल, ५० वटा कोन र ३६ वटा विप्स् प्रदान गरेका थिए । तर, उनलाई त्यत्तिमा चित्त बुझेको थिएन । अझै केही न केही गर्न चाहन्थे । उनले आफ्नो चाहना बालपनका साथी भद्रपुरकै साथी पुरुषोत्तम कट्टेललाई सुनाए । एएफसीमा कार्यरत कट्टेल चन्द्रगढीको फुटबल माहौलबाट परिचित नहुने कुरै भएन । हरिमार्फत उनले पत्र मगाए र सकेको खेल समाग्री पठाए । त्यहि सामान लिएर हरि यसपटक घर फर्केका हुन् ।

‘ मुनाल क्लब गणेश राजभण्डारी, गम्भिर (राई) मामा र जर्मर्नी प्रशिक्षक होल्गर ओभरम्यान मेरो फुटबल जीवनका सबैभन्दा महत्वपूर्ण व्यक्ति र क्लब हुन्’ हरिले भने, ‘जसका कारण चन्द्रगढीको समान्य हरि हरि खड्काका परिचित हुन सके । आफ्नो क्लबलाई थोरै पनि सहयोग गर्न पाउँदा आनन्द लाग्छ । यसपटक एएफसी र पुरुषोत्तमले सहयोग गरिदिदा खुसीको सिमा छैन ।’

हरिलाई मुनाल क्लबका स्थापित गराउने गम्भिर राई, पूर्व राष्ट्रिय युगलकिशोर राई र अन्य तीन जना प्रशिक्षकले तीन महिनादेखि चन्द्रगढी फुटबल एकेडेमी सञ्चालन गरिरहेका छन् । १ सय २५ बालकलाई उनीहरुले प्रशिक्षण दिदै आएका छन् । जहाँ यू १२, यू १४ र यू १५ को उमेर समूहका बालकलाई प्रशिक्षण दिइदै आएको छ । हरि भन्छन् ‘आउने दिनमा पनि म मुनाल क्लब र चन्द्रगढी एकेडेमीका लागि सक्दो सहयोग गर्नेछु । ’