काठमाडौं (हाम्रो खेलकुद)– राष्ट्रिय फुटबल टोलीको पहिलो रोजाइका गोलकिपर किरण चेम्जोङको टोली टिसी स्पोर्टस क्लबले माल्दिभियन प्रिमियर लिगमा सोमबार बराबरी खेलेको छ । अवे खेलमा किरणको टोलीले अंक तालिकाको शीर्ष टोली माजियलाई गोलरहित बराबरी रोक्दै दवाबलाई थोरै कम गराएको छ ।

यमनसँगको एसियन कप छनोटमा म्यान अफ दी म्याच प्रदर्शन गर्दै माल्दिभ्स पुगेपछि भने राष्ट्रिय टोलीका गोलकिपर किरण चेम्जोङ निराश भएका थिए । जेठको अन्तिममा घरेलु मैदानमा उच्च प्रदर्शन गर्दै छनोटमा नेपाललाई १ अंक दिलाउन महत्वपूर्ण भूमिका निर्वाह गरेका किरणले प्रिमियर लिगमा टिसी स्पोर्टसको हारलाई जोगाउन सकेनन् । जहाँ टोली न्यू रेडियन्टसँगको अवे खेलमा किरणको टोली ४–३ ले पराजित भएको थियो । जसका कारण टोली दबाबमा थियो ।

८ टोली सहभागी प्रिमियर लिगमा किरणको टोलीको ११ खेलमा १५ अंक पुगेको छ । माजियाको २५ अंक पुग्यो । सिजनको सुरुआतमा उच्च प्रदर्शन गरेको टिसी स्पोर्टसले पछिल्ला सोमबारअघिका ५ मध्ये १ जित, १ बराबरी र बाँकी ३ खेलमा हार बेहोरेको थियो । अहिले सम्म टोलीले खेलेका ११ खेलमा ४ जित, ३ बराबरी र ४ खेलमा हार बेहोरेको छ । शीर्ष टोली माजियाले भने १० खेलमा ८ जित,१ बराबरी र २ खेलमा हार बेहोरेको थियो ।