बार्सिलोना (एजेन्सी) – स्पेनिस सुपर कप अन्तर्गत पहिलो लेगको खेलमा रेड कार्ड पाएपछि क्रिस्टियानो रोनाल्डोले रेफ्रीमाथि देखाएको आक्रोशको कारण उनले लामो समय प्रतिबन्धमा पर्ने सम्भावना बढेको छ। बार्सिलोनाविरुद्ध आइतबार खेलिएको खेलमा रोनाल्डोले २ मिनेटको अन्तरमा २ पहेंलो कार्ड पाउँदै मैदान बाहिरिएका थिए।
सुपर कपको पहिलो लेगमा बार्सिलोनासँग उत्कृष्ट गोल गरेपछि आफ्नो जर्शी खोलेर खुशी मानाउँदा रोनाल्डोले पहिलो पहेलो कार्डको सामना गरे। त्यसको १ मिनेटपछि बार्सिलोनाको बक्समा लडेर पेनाल्टीको अपेक्षा गर्दा रिकार्डो डी बुर्गोस बेनगोएस्ताले उनलाई दोहोरो पहेलो कार्ड देखाए । प्रतिकारमा आक्रोशीत रोनाल्डोले रेफ्रीलाई धकेलेपछि उनीमाथी थप कारबाही हुने सम्भावना बढेको छ।
स्पेनिस फुटबल एसोसिएसनको नियम अनुसार रेफ्रीमाथी हात लगाउदा ४ खेलदेखी १२ खेलसम्म गुमाउने निश्चित हुन्छ । रेफ्री डी बुर्गोसले आफ्नो खेलपछिको प्रतिवेदनमा रोनाल्डोले धकेलेको पनि खुलाएका छन् , त्यसैले उनले सजाय पाउने लगभग पक्का छ ।, ‘रातो कार्डको सामना गरेपछि रोनाल्डोले मलाई असहमतिमा धकेले ‘ , रेफ्रीको प्रतिवेदनमा उल्लेख छ।
