हल्याण्ड (एजेन्सी)- म्यानचेष्टर युनाइटेडको पूर्व स्ट्राइकर रोविन भान पर्सीले दुई वर्षपछि नेदरल्याण्डको राष्ट्रिय टिममा पुनरागमन गर्ने मौका पाएका छन्।

डच टिमका मुख्य प्रशिक्षक डिक एड्भोक्याटले विश्वकप छनोटको दुई महत्वपूर्ण खेलको लागि भान पर्सीलाई ३२ सदस्यीय प्रारम्भिक टिममा बोलाएका हुन्। प्रशिक्षक डिकले भान पर्सीसँगै रायन बाबेल र एलजिरो एलियालाई पनि ३२ सदस्यीय प्रारम्भिक टिममा समावेश गरेका छन् । फेनरबाचका ३४ वर्षीय भान पर्सी अक्टोबर २०१५ मा युरोकप २०१६ को छनोट खेलमा चेक रिपब्लिकसँग ३–२ ले पराजित भएको खेल यता टिममा पर्न सकेका थिएनन् ।

नेदरल्याण्डले अर्काे साता विश्वकप छनोटका लागि समूह ‘ए’ को शीर्ष स्थानमा रहेको फ्रान्स र बुल्गेरियासँग खेल्ने छ । नेदरल्याण्डले अगष्ट ३१ म पेरिसमा फ्रान्ससँग तथा सेप्टेम्बर ३ मा आम्सटरडमसमा बुल्गेरियासँग खेल्नेछ । भान पर्सीले नेदरल्याण्डका लागि १०१ अन्तर्राष्ट्रिय खेलमा ५० गोल पुरा गरिसकेका छन् ।

‘मैले रोविनसँग अघिल्लो सिजन फेनरवाचमा रहेर सँगै काम गरे । उनी विश्वस्तरका उत्कृष्ट खेलाडी हुन् । कुन खेलमा कसरी खेल्नुपर्छ त्यो रोविनलाई सिकाउनु पर्दैन । हेरौ प्रशिक्षणको दौरान उनले के कति प्रभाव पार्न सक्छन् ।’ प्रशिक्षक डिकले भनेका छन् । यस्तै प्रशिक्षक डिकले आयाक्सका २० वर्षीय मिडफिल्डर डोनी भान डि बिकलाई पहिलो पल्ट राष्ट्रिय टिममा बोलाएका छन् ।