बार्सिलोन (एजेन्सी) – बार्सिलोनाका उरुग्वेली फरवार्ड लुइस स्वारेजले चोटका कारण ला लिगाको नयाँ सिजनको पाँच खेल गुमाउने भएको छ । स्पेनिस सुपरकप अन्र्तगत रियल मड्रिडसँग २–० ले पराजित भएको खेलमा स्वारेजको घुँडामा चोट लागेको थियो ।
खेलको ८५ औं मिनेटमा स्वारेजको घुँडामा चोट लागेपनि उनलाई परिवर्तन गर्न भने मिलेन । त्यति बेलासम्म प्रशिक्षक एर्नेस्टो भाल्भार्देले तीन खेलाडी परिवर्तन गरिसकेका थिए । जसका कारण स्वारेजले बाँकी समय खेल्न संघर्ष गर्नु परेको थियो ।
बार्सिलोनाले बिहिबार मेडिकल परिक्षण लगत्तै आफ्नो वेवसाइटमा स्वारेजको दायाँ घुडामा लागेको चोट गम्भीर रहेको र कम्तीमा पनि एक महिना आराम गर्नुपर्ने उल्लेख गरेको छ ।
यस्तै स्वारेजले विश्वकप छनोट अन्र्तगत अर्जेन्टिना र पारग्वेविरुद्धको खेल पनि गुमाउने पक्का भएको छ । स्वारेजले ला लिगामा रियल बेटिस अलाभेस, स्पान्योल, गेटाफे र एइबरविरुद्धको खेल गुमाउने छन् । नेयमारबिनाको बार्सिलोना स्वारेजको चोटसँगै झनै बढी समस्यामा पर्ने देखिएको छ ।
