लिभरपुल(एजेन्सी) – युरोपियन क्लब फुटबलको दोस्रो ठुलो प्रतियोगिता युरोपा लिगको प्ले अफको खेलमा आफ्नो टोलीले गोल खाएपछि दर्शकले हुल दंगा गरेका छन् ।

युरोपा लिग अन्तर्गत प्ले अफको पहिलो लेगमा घरेलु टोली एभर्टनले गोल गरेलगतै क्रोएसियन क्लब हाजदक स्प्लिटका दर्शकले मैदानमा विभिन्न वस्तुहरु फालेर हुलदंगा गरेपछि खेल केही बेर रोकिन पुगेको थियो । इभर्टनका माइकल किन्ले हेडमार्फत ३० औँ मिनेटमा गोल गरेर अग्रता दिलाएका थिए ।

किन्ले गोल गरेको केहीबेरमै दर्शकहरुले मैदानमा विभिन्न वस्तु फाल्न थाले । उनीहरुले विज्ञापनका बोर्डहरु भत्काउने गर्न थाले । उनीहरु मैदानमा नै प्रवेश गर्न खोजेका थिए । जसका कारण म्याच रेफ्री खेल रोक्न बाध्य भए । सुरक्षाकर्मीहरुले हुलदंगालाई सामान्य पार्न झण्डै ५ मीनेट खर्चिएका थिए ।

दर्शकले उग्र व्यवहार देखाइरहँदा खेलडीहरु भने मैदानको एक छेउमा बसेर स्थिति शान्त हुने प्रतिक्षा गरिरहेका थिए । खेल पुनः सुरु भएपछि ४५ औँ मिनेटमा एभर्टनका इड्रिसा गुएयेले गोल गर्दै अग्रता दोब्बर बनाए । जितसँगै एभर्टनको युरोपा लिगको समूह चरणमा पुग्ने सम्भावना बलियो भएको छ । दोस्रो लेग अर्काे साता बिहीबार हुनेछ ।