म्यानचेस्टर (एजेन्सी)– ज्लाटान इब्राहिमोभिच म्यानचेस्टर युनाइटेडमा पुनः आबद्ध हुने सम्भावना बढेको छ । सम्भवतः उनले अर्को महिनाको सुरुआतमा युनाइटेडसँग नयाँ सम्झौता गर्न सक्नेछन् ।

यद्दपी चोटका कारण ३५ वर्षे इब्राहिमोभिच नयाँ बर्षको सुरुआत सम्म मैदान बाहिर रहन सक्छन् । अप्रिलमा एन्डरलेकविरुद्ध युरोपा लिग खेल्ने क्रममा उनको घुँडामा चोट लागेको थियो । प्रशिक्षक जोसे माउरिन्हो यसपटक च्याम्पियन्स लिगको नकआउट चरण पुग्नका लागि पुनः इब्राहिभोभिचलाई भित्राउने तयारीमा छन् ।

माउरिन्होको टोलीले गत सिजन छैटौं स्थानमा रहँदै प्रिमियर लिगको अन्त्य गरेको थियो । यद्दपी यसपटक च्याम्पियन्स लिग खेल्ने युनाइटेड पाँचौं इङ्लिस क्लब हुनेछ । मेमा युरोपा लिगको फाइनलमा आयक्सलाई २–० ले हराउँदै युनाइटेड च्याम्पियन्स लिगका लागि छनोट भएको थियो ।

फ्रान्सेली अन्तर्राष्ट्रिय एवंम् तत्कालिन समयमा विश्व कीर्तिमानी रकममा सरुवा भएका पाउल पोग्बा र हेनरिक मखातारियनको गोलमा युनाइटेडले युरोपा लिगको उपाधि जितेको थियो । जसले गर्दा टोली एक वर्षको अन्तरपछि पुनः च्याम्पियन्स लिगमा फर्कन सफल भएको छ ।

युरोपा लिगको उपाधि इब्राहिमोभिचको खेल जीवनको ३३ औं महत्वपूर्ण उपाधि हो । स्वीडेनका पूर्व कप्तान समेत रहेका उनले सन् २००१ मा आयक्सबाट खेल जीवनको सुरुआत गरेका थिए । त्यसयता उनी कुनै सिजन उपाधि विहिन हुन परेको छैन ।

स्वीडेनका सुपर स्टारले गत सिजन युनाइटेडबाट प्रिमियर लिगमा १७ खेलमा १७ गोल गर्दै गरेका थिए । क्लबसँगको सम्झौता सकिएपछि चोटमुक्त हुनका लागि युनाइटेडले उनलाई क्लबको सुविधा प्रयोग गर्न दिएको थियो । उनी अहिले छुट्टि मनाई रहेका छन् ।

पेरिस सेन्ट जर्मेन (पिएसजी) बाट इब्राहिमोभिच गत सिजनका लागि युनाइटेडमा आबद्ध भएका थिए । अहिले उनी चोटमुक्त हुने क्रममा रहेका छन् । उनको सुधार सन्तोषजनक रहेको बताइएको छ । युनाइटेडले पुनः उनी टोलीको हिस्सा बन्ने अपेक्षा राखेको छ । युनाइटेड अर्को महिनाको तयारीमा उनलाई क्लबमा पुनः प्रवेश गराउने योजनामा छ ।