म्यानचेस्टर (एजेन्सी)– ज्लाटान इब्राहिमोभिच पुनः क्लबमा फर्केने म्यानचेस्टर युनाइटेडले जनाएको छ । ओल्ड ट्राफड छोडेको तीन महिनाभन्दा कम समयमा उनी फेरी युनाइटेड फर्केका हुन् ।
युनाइटेडले बिहीबार छोटो विज्ञप्ती जारी गर्दै भनेको छ,‘ ज्लाटान इब्राहिमोभिचले यात्रालाइृ निरन्तरता दिने छन् भन्ने घोषणा गर्न पाउँदा क्लब खुसी व्यक्त गर्दछ । उनले क्लबसँग एक बर्षको सम्झौता गरेका छन् । अब उनले १० नम्बरको जर्सी लगाउने छन् । ’
युनाइटेडमा इब्राहिभोभिचले अघिल्लो सिजन लगाएको ९ नम्बरको जर्सी यहि सिजन एभर्टनबाट क्लबमा पुगेका रोमेलु लुकाकुलाई दिइएको छ । युनाइटेडमा यसअघि वायन रुनीले १० नम्बरको जर्सी लगाउथे । रुनी १३ वर्षपछि यो सिजन एभर्टन फर्केपछि १० नम्बर इब्राहिमोभिचले लगाउने भएका छन् ।
स्वीडेनका स्ट्राइकर इब्राहिभोभिचले गत सिजन युनाइटेडबाट ४६ खेलमा २८ गोल गरेका थिए । त्यहि क्रममा उनको घुँडामा चोट लागेको थियो । उनी पूर्ण रुपमा फिट हुन अझै कम्तीमा तीन महिना लाग्ने बताइएको छ । युनाइटेड जानुअघि उनी पेरिस सेन्ट जर्मेन (पिएसजी) मा थिए ।
