मोनाको (एजेन्सी)– सुपरस्टारद्वय क्रिस्टियानो रोनाल्डो र लियोनल मेस्सी औपचारिक कार्यक्रममा सँगसँगै देखिदा धेरैको ध्यान तानेका थिए । गए राती युइएफएको उत्कृष्ट युरोपिनय खेलाडी अवार्ड कार्यक्रममा उनीहरु नजिकै बसेका थिए ।

अवार्ड समारोहमा बायाँबाट क्रमश – मेस्सी, बुफोन र रोनाल्डो ।

च्याम्पियन्स लिगको ‘ड्र’ का दौरान आयोजित अवार्ड लगातार दोस्रो पटक रियल म्याड्रिडका रोनाल्डोले जितेका थिए । यी दुई चिर प्रतिद्वन्द्विसहित युभेन्ट्सका गोलकिपर जियानलुइजी बुफोन पनि मनोनयमा परेका थिए । बुफोन मेस्सी र रोनाल्डोको बीचमा बसेका थिए । रोनाल्डो बुफोनसँग ठट्टा गरेको पनि देखिएको थियो ।

अवार्डमा उपस्थित भएपनि बार्सिलोनाका फरवार्ड मेस्सीलाई आफुभन्दा रोनाल्डो अवार्डको हकदार रहेको सायद बुझेकै हुनुपर्दछ । रोनाल्डोको टोलीले मेमा लगातार दोस्रो पटक च्याम्पियन्स लिगको उपाधि जितेको थियो । उपाधि जित्ने क्रममा रियलले बुफोनको युभेन्ट्सलाई हराएको थियो । तीन पटक उक्त अवार्ड जित्ने रोनाल्डो पहिलो खेलाडी पनि बनेका छन् ।

च्याम्पियन लिग र युरोपा लिगका ८० प्रशिक्षक, ५५ पत्रकार र युइएफएका सदस्य संघहरुका प्रतिनिधिले दिएको मतका आधारमा रोनाल्डोले अवार्ड जितेका थिए । रोनाल्डोले ४ सय ८२ अंक प्राप्त गर्दा मेस्सीले १ सय ४१ र बुफोनले १ सय ९ अंक पाएका थिए ।

‘यहाँ आउँदा र अवार्ड जित्दा खुुुसी महसुस गरेको छु’ रोनाल्डोले भने, ‘टोलीका सबै साथीलाई धन्यवाद दिन चाहन्छु र सबैलाई बधाई पनि दिन्छु । म धन्य भएको छु । रियलका समर्थकलाई पनि धन्यवाद दिन चाहन्छु जसको समर्थनले म यो अवार्ड फेरि जित्न सफल भएको छु ।’

गत सिजन रोनाल्डोले ४६ खेलमा ४२ गोल गरेका थिए । यद्दपी सन् २००९ मा म्यानचेस्टर युनाइटेडबाट रियल आएयता रोनाल्डोको त्यो कमजोर प्रदर्शन हो । फाइनलमा २ गोलसहित गत सिजन च्याम्पियन्स लिगमा १२ गोल गरेका रोनाल्डोले १३ खेल खेल्ने क्रममा ४ गोलमा असिस्ट पनि गरेका थिए । उनको प्रदर्शनकै प्रभावले जिनेदिन जिदानको रियल लगातार दुई पटक च्याम्पियन्स लिग जित्ने इतिहासकै पहिलो टोली बनेको थियो ।