भाडुज (एजेन्सी)– विश्व कप छनोट अन्तर्गत समूह ‘जी’को शीर्षस्थानमा रहेको स्पेनले लिचेस्टाइनमाथि ८–० को जित हासिल गरेको छ । स्पेनको ८ खेलमा ७ जित र १ बराबरीसँगै २२ अंक छ । लिचेस्टाइन ८ खेलपछि पनि अंक विहिन छ ।

अघिल्लो खेलमा इटालीलाई ३–० ले हराएको स्पेनले खेलको १६ मिनेटसम्म ३–० को अग्रता लिएको थियो । सर्जियो रामोसले तेस्रो मिनेटमा गोलको खाता खोले भने चेल्सीका स्ट्राइकर अल्भारो मोराटाले १५ औं र रियल म्याड्रिडका मिडफिल्डर इस्कोले १६ औं मिनेटमा गोल गरेका थिए ।

म्यानचेस्टर सिटीका मिडफिल्डर डेभिड सिल्भाले ४१ औं मिनेटमा स्पेनका लागि थप गोल गरे । पहिलो हाफमा ४–० को अग्रता लिएको स्पेनले दोस्रो हाफमा पनि ४ गोल गर्यो । लिभरपुलका पूर्व स्ट्राइकर आइगो आसपासले दुई गोल गरे भने अल्भारो मोराटाले अर्को गोल थपे । त्यस्तै घरेलु टोलीबाट १ आत्मघाती गोल पनि भयो ।

आसपासले ५१ औं र ६३ औं मिनेटमा तथा मोराटाले ५४ औं मिनेटमा गोल गरे । घरेलु टोलीका म्याक्सीमिलियम गोप्पेलबाट ८९ औं मिनेटमा आत्मघाती गोल भएको थियो । समूहको अन्य खेलमा इटालीले सिरो इम्मोबाइलको निर्णायक गोलमा इजरेललाई १–० ले हरायो । इटाली १९ अंक सहित समूहको दोस्रो स्थानमा छ । सोही समूहमा म्यासेडोनिया र अल्बेनियाले १–१ को बराबरी खेले ।

अन्य नतिजाहरु

समूह डी – अस्ट्रिया १–१ जियोर्जिया , आयरल्याण्ड ०–१ सर्बिया , मोल्डोभा ०–२ वेल्स

समूह आइ – आइसल्याण्ड २–० युक्रेन , कोसोभो ०–१ फिनल्यान्ड, टर्की १–० क्रोसिया